लंडन; वृत्तसंस्था : सलामीवीर बेन डकेटचे (१३५ चेंडूंत १८ चौकार, १ षटकारासह १४१) झंझावाती शतक आणि जेकब बेथेलच्या ९१ धावांच्या जोरावर इंग्लंडने रविवारी लॉर्डस्वर खेळल्या गेलेल्या तिसऱ्या आणि निर्णायक वन-डे सामन्यात भारताचा २७ धावांनी धुव्वा उडविला. प्रारंभी, ५० षटकांत ३ बाद ३८७ धावांचा डोंगर उभा केल्यानंतर भारतानेही जोरदार प्रतिकार केला. रोहित शर्माने ११० चेंडूंत १३८ धावा चोपल्या, तर शुभमन गिल व विराट कोहली यांनीही शानदार अर्धशतके झळकावली. तरीही भारताला २७ धावांनी पराभवाचा सामना करावा लागला. यजमान इंग्लंडने यासह तीन सामन्यांची ही मालिका २-१ फरकाने जिंकली.
येथे प्रथम फलंदाजी करणाऱ्या इंग्लंडला डकेट आणि बेथेल जोडीने १९२ धावांची विक्रमी भागीदारी केली. २२ वर्षांच्या बेथेलने ११ चौकार आणि २ षटकारांसह ९१ धावा केल्या. त्यानंतर माजी कर्णधार जो रूट आणि जोस बटलर यांनी अखेरच्या षटकांमध्ये धावांचा पाऊस पाडला. इंग्लंडने शेवटच्या ५ षटकांत तब्बल ८२ धावा लुटल्या. रूटने ४८ चेंडूंत नाबाद ७४ धावा फटकावल्या. कर्णधार बटलरने अवघ्या १३ चेंडूंत नाबाद ४१ धावा कुटल्या. लॉर्डस्च्या ऐतिहासिक मैदानावर कोणत्याही संघाची ही सर्वोच्च वन-डे धावसंख्या ठरली आहे. रोहित व विराट यांनी आंतरराष्ट्रीय क्रिकेटमध्ये एकत्र ४०० सामने खेळण्याचा विक्रम येथे प्रस्थापित केला.
इंग्लंड : ५० षटकांत ३ बाद ३८७. (बेन डकेट १३५ चेंडूंत १८ चौकार, १ षटकारासह १४१, बेथेल ११ चौकार, २ षटकारांसह ९१. जो रूट ७४, बटलर १३ चेंडूंत ४ चौकार, ३ षटकारांसह नाबाद ४१. प्रसिद्ध कृष्णा २/६९, प्रिन्स यादव १/७९)
भारत : ५० षटकांत ७ बाद ३६०. (रोहित शर्मा ११० चेंडूंत १७ चौकार, ५ षटकारांसह १३८, शुभमन गिल ८४ चेंडूंत ७७, विराट कोहली ६० चेंडूंत ७४. सॅम करन ४/७५, रशीद, बेथेल प्रत्येकी १ बळी).
