Ronaldo mocked with Messi chants : फिफा विश्वचषक २०२६ (FIFA World Cup 2026): डीआर काँगोविरुद्धच्या सामन्यात पोर्तुगालचा सामना १-१ असा बरोबरीत सुटल्यानंतर ख्रिस्तियानो रोनाल्डोला मोठ्या निराशेचा सामना करावा लागला. या सामन्यात रोनाल्डोला एकही गोल करता आला नाही. सामन्यानंतर काही चाहत्यांनी रोनाल्डोला चिडवण्यासाठी 'मेस्सी-मेस्सी'च्या घोषणा दिल्या. याचा व्हिडिओ सध्या सोशल मीडियावर तुफान व्हायरल होत आहे.
डीआर काँगोविरुद्धच्या सामन्यात रोनाल्डोला एकही गोल करता आला नाही. त्यामुळे स्टेडियममध्ये उपस्थित असलेल्या डीआर काँगोच्या काही चाहत्यांनी रोनाल्डोला चिडवण्यासाठी 'मेस्सी-मेस्सी'च्या घोषणा देण्यास सुरुवात केली. मात्र, रोनाल्डोने यावर कोणतीही प्रतिक्रिया दिली नाही आणि तो थेट टनेलच्या दिशेने निघून गेला. आपल्या कारकिर्दीतील सहावा विश्वचषक खेळणाऱ्या या पोर्तुगीज स्टारसाठी हा सामना अपेक्षेप्रमाणे राहिला नाही.
फिफा विश्वचषक २०२६ मधील पोर्तुगाल आणि डीआर काँगो यांच्यातील हा सामना अनेक कारणांमुळे चर्चेत राहिला. एकीकडे डीआर काँगोने तब्बल ५२ वर्षांनंतर विश्वचषकात पुनरागमन करत पोर्तुगालसारख्या बलाढ्य संघाला १-१ अशा बरोबरीत रोखले; तर दुसरीकडे ख्रिस्तियानो रोनाल्डोची सुमार कामगिरीही हेडलाईन्समध्ये राहिली. सामन्यानंतर काही चाहत्यांनी रोनाल्डोला चिडवण्यासाठी 'मेस्सी-मेस्सी'च्या घोषणा दिल्या, ज्याचा व्हिडिओ सध्या सोशल मीडियावर तुफान व्हायरल होत आहे.
रोनाल्डोसाठी हा सामना अत्यंत निराशाजनक ठरला. संपूर्ण सामन्यात चेंडू केवळ २५ वेळा त्याच्याकडे आला आणि त्याला एकही शॉट लक्ष्यावर मारता आला नाही. सामन्याच्या सहाव्या मिनिटाला होआओ नेवेसने पोर्तुगालला १-० अशी आघाडी मिळवून दिली होती. पेड्रो नेटोच्या क्रॉसवर नेवेसने शानदार हेडर मारत संघाला आघाडी मिळवून दिली. मात्र, पहिल्या हाफच्या अतिरिक्त वेळेत योआने विस्साने आर्थर मासुआकुच्या क्रॉसवर हेडरद्वारे गोल करत डीआर काँगोला १-१ अशी बरोबरी साधून दिली. विश्वचषकाच्या इतिहासातील डीआर काँगोचा हा पहिलावहिला गोल ठरला.
सामना संपल्यानंतर स्टेडियममध्ये उपस्थित असलेल्या डीआर काँगोच्या काही समर्थकांनी रोनाल्डोला पाहताच 'मेस्सी-मेस्सी'च्या घोषणा देण्यास सुरुवात केली. सोशल मीडियावर व्हायरल झालेल्या व्हिडिओमध्ये हा आवाज स्पष्ट ऐकू येत आहे. परंतु, रोनाल्डोने यावर कोणतीही प्रतिक्रिया दिली नाही. तो अत्यंत शांतपणे मैदानातून बाहेर पडला आणि टनेलकडे गेला. विशेष म्हणजे, आदल्याच दिवशी लिओनेल मेस्सीने विश्वचषकात अप्रतिम कामगिरी करत हॅट्ट्रिक नोंदवली होती, तर दुसरीकडे रोनाल्डोला गोल करण्यात अपयश आले; त्यामुळेच चाहत्यांनी त्याला अधिक ट्रोल केले.
या सामन्यात रोनाल्डोकडे एक नवा इतिहास रचण्याची सुवर्णसंधी होती. अर्जेंटिनाचा कर्णधार लिओनेल मेस्सीसह सहा विश्वचषक खेळणारा तो जगातील केवळ दुसरा खेळाडू ठरला आहे. जर त्याने डीआर काँगोविरुद्ध गोल केला असता, तर सलग सहा वेगवेगळ्या विश्वचषकांमध्ये गोल करणारा तो जगातील पहिला फुटबॉलपटू बनला असता. मात्र, ६८व्या आणि ७३व्या मिनिटाला केलेले त्याचे दोन्ही प्रयत्न अपयशी ठरले. या दोन्ही प्रसंगी रोनाल्डो कमालीचा निराश दिसला. दरम्यान, रोनाल्डोने आपल्या इंस्टाग्रामवर एक फोटो शेअर करत लिहिले, "आम्हाला हवी तशी ही सुरुवात नाही, पण अजून काही संपलेले नाही. पुढे चला आणि पुढच्या सामन्यावर लक्ष केंद्रित करा."
डीआर काँगोसाठी हा सामना अत्यंत ऐतिहासिक ठरला. हा संघ तब्बल ५२ वर्षांनंतर विश्वचषकात खेळत होता. यापूर्वी १९७४ मध्ये, जेव्हा या देशाचे नाव 'झैरे' (Zaire) होते, तेव्हा त्यांनी विश्वचषकात भाग घेतला होता. त्यावेळी संघ आपले तिन्ही सामने हरला होता आणि त्यांना एकही गोल करता आला नव्हता. अशा परिस्थितीत, पोर्तुगालसारख्या बलाढ्य संघाविरुद्ध सामना बरोबरीत सोडवणे आणि विश्वचषकाच्या इतिहासातील पहिला गोल करणे ही डीआर काँगोसाठी एक अविस्मरणीय कामगिरी ठरली आहे.
या सामन्यात पोर्तुगालचा विजय निश्चित मानला जात होता, परंतु संघाला मिळालेल्या संधींचा योग्य फायदा उठवता आला नाही. ब्रुनो फर्नांडिसनेही शेवटच्या मिनिटांत गोल करण्याची एक सोपी संधी गमावली. आता आगामी सामन्यांमध्ये पोर्तुगाल आणि ख्रिस्तियानो रोनाल्डो या दोघांवरही चांगली कामगिरी करण्याचे प्रचंड दडपण असणार आहे.
