India A vs New Zealand A 3rd match : दुखापतीमुळे यष्टिरक्षक-फलंदाज ऋषभ पंत शनिवारपासून लिंकन येथे न्यूझीलंड ‘अ’ संघाविरुद्ध होणाऱ्या तिसऱ्या सामन्याला मुकणार आहे. दरम्यान, कसोटी मालिकेची जय्यत तयारी म्हणून स्टार वेगवान गोलंदाज जसप्रीत बुमराह आणि अष्टपैलू रवींद्र जडेजा हे दोघेही या सामन्यासाठी मैदानावर उतरतील.
पंतच्या पोटाच्या स्नायूंना (रिब्सजवळ) दुखापत झाली असून, सध्या तो बेंगळुरू येथील 'सेंटर ऑफ एक्‍सेलन्स'मध्ये पुनर्वसन प्रक्रियेतून जात आहे. यामुळे आगामी १९ नोव्हेंबरपासून वेलिंग्टनच्या बेसिन रिझर्व्हवर सुरू होणाऱ्या दोन सामन्यांच्या कसोटी मालिकेत त्याच्या सहभागाबद्दल साशंकता निर्माण झाली आहे.निवडकर्त्यांनी न्यूझीलंडविरुद्धच्या कसोटी मालिकेसह ‘इंडिया अ’ संघातही पंतची निवड केली होती; मात्र त्याचा अंतिम समावेश पूर्ण फिटनेस मंजुरीवर अवलंबून होता. यापूर्वीही त्याला न्यूझीलंड ‘अ’ विरुद्धच्या पहिल्या दोन सामन्यांतून बाहेर ठेवण्यात आले होते. पंतच्या अनुपस्थितीत युवा खेळाडू ध्रुव जुरेल ‘इंडिया अ’ संघाचे नेतृत्व कायम ठेवेल. पंत कसोटी मालिकेपूर्वी तंदुरुस्त न झाल्यास जुरेल यष्टिरक्षणाची धुरा सांभाळण्याची दाट शक्यता आहे.
कसोटी तज्ज्ञ जसप्रीत बुमराह आणि रवींद्र जडेजा आगामी मालिकेच्या तयारीचा भाग म्हणून लिंकन येथील या सामन्यात मैदानात उतरतील. भारतामध्ये परतल्यानंतर बुमराहने सलग दोन दिवस कसून सराव केला आहे. ऑक्टोबरच्या सुरुवातीला झालेल्या आशियाई क्रीडा स्पर्धेच्या अंतिम सामन्यानंतर बुमराहने एकही सामना खेळलेला नाही. रवींद्र जडेजा सौराष्ट्रकडून दोन रणजी सामने खेळून या मालिकेत दाखल होत आहे.
गेले तीन आठवडे हॅमस्ट्रिंगच्या दुखापतीमुळे पुनर्वसन करत असलेल्या प्रसिद्ध कृष्णाने मॅच-फिटनेस मिळवली असून, तोदेखील या ‘अ’ सामन्यात खेळण्याची दाट शक्यता आहे. प्रसिद्धला सर्व फॉरमॅटमध्ये खेळण्याची मंजुरी मिळाली असली, तरी कसोटीसाठी तंदुरुस्त राखण्याच्या धोरणातून त्याला एकदिवसीय संघात स्थान देण्यात आलेले नाही. त्याच्या जागी जम्मू-कश्मीरचा वेगवान गोलंदाज आकीब नबीला एकदिवसीय संघात स्थान मिळाले आहे.