मुंबई : पुढील ५ आठवड्यांमध्ये तब्बल ६९ क्रिकेटपटू वेगवेगळ्या १५ स्पर्धा आणि मालिकांमध्ये खेळणार असल्याने भारतीय क्रिकेट संघाच्या टीम मॅनेजमेंट आणि राष्ट्रीय वरिष्ठ निवड समितीसमोर सध्या मोठे आव्हान आहे.
भारतीय पुरुष संघाला आगामी काळात कसोटी, वनडे आणि टी-ट्वेंटी अशा तिन्ही फॉरमॅटमध्ये व्यस्त वेळापत्रकाला सामोरे जावे लागणार आहे. भारतीय पुरुष संघ जपानमध्ये आशियाई क्रीडा स्पर्धा खेळणार तेव्हाच भारत-वेस्ट इंडिज मालिकादेखील भारतात खेळवली जाणार आहे. भारतीय संघ वेस्ट इंडिजविरुद्ध घरच्या मैदानावर तीन वनडे आणि पाच टी-ट्वेंटी सामन्यांची मालिका खेळणार आहे. त्याचवेळी (पुढील आठवड्यापासून) भारत अ संघ ऑस्ट्रेलिया अ संघाविरुद्ध मल्टी-डे आणि ५० षटकांच्या सामन्यांची मालिका खेळणार आहे.
देशांतर्गत क्रिकेटमध्ये १ ऑक्टोबरपासून शेष भारत (रेस्ट ऑफ इंडिया) संघ इराणी कपमध्ये मैदानात उतरणार असून श्रीनगरमध्ये रणजी ट्रॉफी विजेता जम्मू-काश्मीर त्यांच्याविरूद्ध खेळेल. एकूणच, २२ सप्टेंबर ते १७ ऑक्टोबरदरम्यान भारतात विविध फॉरमॅटमध्ये तब्बल ६९ वेगवेगळे खेळाडू १५ मैदानांवर खेळताना दिसणार आहेत. त्यामुळे एवढ्या मोठ्या क्रिकेट कार्यक्रमासाठी खेळाडूंची निवड, संघ व्यवस्थापन आणि योग्य संयोजन राखण्याचे मोठे आव्हान बीसीसीआयसमोर असणार आहे.
वेस्ट इंडिजविरुद्ध भारताच्या वनडे संघात शुबमन गिल (कर्णधार), रोहित शर्मा, विराट कोहली, ऋतुराज गायकवाड, लोकेश राहुल (उपकर्णधार), ध्रुव जुरेल, नितीश कुमार रेड्डी, रवींद्र जडेजा, कुलदीप यादव, प्रसिद्ध कृष्णा, गुरनूर ब्रार, मोहम्मद सिराज, औकिब नबी, यशस्वी जैस्वाल आणि नमन धीर तसेच वेस्ट इंडिजविरुद्ध आणि आशियाई क्रीडा स्पर्धेसाठी भारताच्या टी- ट्वेंटी संघात श्रेयस अय्यर (कर्णधार), अभिषेक शर्मा, वैभव सूर्यवंशी, ईशान किशन (यष्टीरक्षक), संजू सॅमसन (यष्टीरक्षक), तिलक वर्मा (उपकर्णधार), शिवम दुबे, कुलदीप यादव, अक्षर पटेल, वॉशिंग्टन सुंदर, रवी बिश्नोई, नितीश कुमार रेड्डी, अर्शदीप सिंह, प्रिन्स यादव आणि मयंक यादव. (आशियाई क्रीडा स्पर्धेसाठी खेळाडू) जसप्रीत बुमराह, विप्रज निगम आणि यश ठाकूर यांचा समावेश आहे.
