BCCI schedule 2026-27
नवी दिल्ली : भारतीय क्रिकेट नियामक मंडळाने (BCCI) गुरुवारी टीम इंडियाच्या २०२६-२७ च्या आंतरराष्ट्रीय घरगुती हंगामाचे संपूर्ण वेळापत्रक जाहीर केले आहे. येणाऱ्या आगामी हंगामात वेस्ट इंडिज, श्रीलंका, झिम्बाब्वे आणि ऑस्ट्रेलिया हे चार संघ विविध स्वरूपातील (Formats) मालिकांसाठी भारताचा दौरा करणार आहेत. यामुळे देशभरातील चाहत्यांना क्रिकेटचा थरार अनुभवण्याची संधी मिळणार आहे.
२०२६-२७ च्या आंतरराष्ट्रीय घरगुती हंगामात १७ शहरांमध्ये एकूण २२ सामने खेळवले जाणार आहेत. भारताच्या घरगुती हंगामाची सुरुवात २७ सप्टेंबर २०२६ पासून वेस्ट इंडिजविरुद्धच्या मालिकेने होईल. या दौऱ्यात तीन एकदिवसीय (ODI) आणि पाच टी-२० (T20I) सामन्यांचा समावेश आहे. एकदिवसीय सामने तिरुवनंतपुरम, गुवाहाटी आणि न्यू चंदीगड येथे होतील, तर टी-२० सामने लखनौ, रांची, इंदूर, हैदराबाद आणि बेंगळुरू येथे खेळवले जातील.
यानंतर डिसेंबर २०२६ मध्ये श्रीलंका संघ भारत दौऱ्यावर येईल. या मालिकेत तीन एकदिवसीय आणि तीन टी-२० सामने खेळवले जातील. दिल्ली, बेंगळुरू आणि अहमदाबाद येथे एकदिवसीय सामने होतील, तर राजकोट, कटक आणि पुणे येथे टी-२० सामन्यांचे आयोजन करण्यात आले आहे.
२०२७ च्या सुरुवातीला, जानेवारी महिन्यात झिम्बाब्वेचा संघ तीन सामन्यांच्या एकदिवसीय मालिकेसाठी भारतात येईल. हे सामने कोलकाता, हैदराबाद आणि मुंबई येथे खेळवले जातील, जे नवीन वर्षातील आंतरराष्ट्रीय क्रिकेटची सुरुवात करतील.
या हंगामाचा समारोप अत्यंत प्रतिष्ठेच्या 'बॉर्डर-गावस्कर ट्रॉफी'ने होईल. ऑस्ट्रेलियाविरुद्धची ही पाच सामन्यांची कसोटी मालिका २१ जानेवारी २०२७ पासून नागपूर येथे सुरू होईल. त्यानंतर उर्वरित सामने चेन्नई, गुवाहाटी, रांची आणि अहमदाबाद येथे खेळवले जातील.
