भारताचा स्टार बॅडमिंटनपटू लक्ष्य सेन याने कुममातो मास्टर्स जपान बॅडमिंटन स्पर्धेच्या उपांत्यपूर्व फेरीत धडक मारली आहे. त्याने गुरुवारी (दि. १३) झालेल्या सामन्यात सिंगापूरच्या जिया हेंग जेसन तेहचा सरळ गेममध्ये पराभव करून आपले स्थान निश्चित केले. मात्र, दुसरीकडे भारताचा अनुभवी खेळाडू एच.एस. प्रणॉय याचा प्रवास दुसऱ्या फेरीतच संपुष्टात आला. प्रणॉयला ४६ मिनिटे चाललेल्या या दुसऱ्या फेरीच्या सामन्यात डेन्मार्कच्या रासमस गेम्केकडून १८-२१, १५-२१ अशा फरकाने पराभवाला सामोरे जावे लागले.
सन २०२१ च्या जागतिक अजिंक्यपद स्पर्धेचा कांस्यपदक विजेता असलेल्या लक्ष्य सेनने जगातील २०व्या क्रमांकाच्या तेहवर ३९ मिनिटांत २१-१३, २१-११ असा सहज विजय मिळवला. संपूर्ण सामन्यात लक्ष्यचेच वर्चस्व पाहायला मिळाले. त्याने सिंगापूरच्या खेळाडूला पुनरागमन करण्याची कोणतीही संधी दिली नाही. आता उपांत्यपूर्व फेरीत लक्ष्य सेनची लढत जागतिक क्रमवारीत १५व्या स्थानी असलेल्या सिंगापूरच्या माजी विश्वविजेत्या लोह कीन यू याच्याशी होणार आहे.
प्री-क्वार्टर फायनलमध्ये लक्ष्यने पहिल्या गेममध्ये ८-५ अशी आघाडी घेतली होती. त्यानंतर तेहने थोड्या वेळासाठी १०-९ अशी नाममात्र आघाडी घेतली असली तरी, ब्रेकपर्यंत भारतीय खेळाडूने पुन्हा आघाडी मिळवली. १४-१३ अशा स्कोअरपर्यंत दोन्ही खेळाडूंमध्ये चुरशीची लढत झाली, पण यानंतर लक्ष्यने सलग सात गुण मिळवून पहिला गेम आपल्या नावावर केला.
दुसऱ्या गेममध्येही लक्ष्यने सुरुवातीपासूनच उत्कृष्ट खेळ दाखवला आणि लवकरच ५-० अशी आघाडी घेतली. इंटरव्हलपर्यंत त्याने ११-३ अशी मोठी आघाडी घेऊन आपल्या प्रतिस्पर्धकाच्या आशा धुळीस मिळवल्या. यानंतरही भारतीय खेळाडूने आपली लय कायम ठेवली आणि सहजपणे सामना जिंकला.
यापूर्वी, लक्ष्य सेनने जपानच्या कोकी वतानबेचा सरळ गेममध्ये पराभव करून दुसऱ्या फेरीत प्रवेश केला होता. जपानच्या जागतिक क्रमवारीत २६व्या स्थानी असलेल्या वतानबेला याचाही लक्ष्यने केवळ ३९ मिनिटांत २१-१२, २१-१६ अशा फरकाने पराभव केला होता.
