पर्थ : डार्विन येथे खेळल्या गेलेल्या पहिल्या कसोटी सामन्यात बांगलादेशने ऑस्ट्रेलियावर ९ गडी राखून ऐतिहासिक विजय नोंदवला. या अनपेक्षित पराभवामुळे दोन सामन्यांच्या कसोटी मालिकेत यजमान ऑस्ट्रेलियावर मालिका पराभवाचे सावट निर्माण झाले आहे. जर कांगारू संघाला मालिका बरोबरीत राखायची असेल, तर २२ ऑगस्टपासून मॅके येथे सुरू होणाऱ्या दुसऱ्या कसोटीत त्यांना कोणत्याही परिस्थितीत विजय मिळवणे अनिवार्य आहे. या निर्णायक लढतीसाठी ऑस्ट्रेलियन संघाने मोर्चेबांधणी तीव्र केली असून संघात मोठी खांदेपालट करत एका सलामीवीराला बाहेरचा रस्ता दाखवला आहे.
क्रिकेट ऑस्ट्रेलियाने मंगळवारी, १८ ऑगस्ट रोजी सकाळी दुसऱ्या कसोटीसाठी आपल्या संघाची घोषणा केली. पहिल्या सामन्यातील सुमार कामगिरीनंतर सलामीवीर जॅक वेदरल्ड याला संघातून वगळण्यात आले असून, त्याच्या जागी मॅथ्यू रेनशॉचा संघात समावेश करण्यात आला आहे. दुसरीकडे, सातत्यपूर्ण खराब फॉर्ममुळे टीकेचे धनी ठरलेल्या मार्नस लॅबुशेनवर गंडांतर येण्याची शक्यता होती; मात्र संघ व्यवस्थापनाने त्याच्यावर पुन्हा एकदा विश्वास दाखवत त्याला आणखी एक संधी दिली आहे.
डावखुरा फलंदाज मॅथ्यू रेनशॉ याने आपला अखेरचा कसोटी सामना २०२३ मध्ये भारताविरुद्ध दिल्ली येथे खेळला होता. त्यानंतर प्रदीर्घ काळापासून तो कसोटी पुनरागमनाच्या प्रतीक्षेत होता. या दरम्यान त्याने मर्यादित षटकांच्या क्रिकेटमध्ये ऑस्ट्रेलियाचे प्रतिनिधित्व केले असले, तरी तब्बल तीन वर्षांनंतर त्याचे कसोटी संघात पुनरागमन झाले आहे. आता मॅके येथील दुसऱ्या कसोटीत त्याला अंतिम अकरा खेळाडूंमध्ये संधी मिळते का, याकडे क्रीडाप्रेमींचे लक्ष लागले आहे.
बांगलादेशविरुद्धच्या दुसऱ्या कसोटीसाठी घोषित करण्यात आलेल्या ऑस्ट्रेलियन संघात कर्णधार पॅट कमिन्ससह स्कॉट बोलँड, अॅलेक्स कॅरी, कॅमेरून ग्रीन, जोश हेझलवूड, ट्रॅव्हिस हेड, जोश इंग्लिस, मार्नस लॅबुशेन, नॅथन लायन, मॅथ्यू रेनशॉ, स्टीव्ह स्मिथ, मिचेल स्टार्क आणि ब्यु वेबस्टर यांचा समावेश आहे.
बांगलादेशविरुद्धच्या दुसऱ्या कसोटीसाठी घोषित करण्यात आलेल्या ऑस्ट्रेलियन संघात कर्णधार पॅट कमिन्ससह स्कॉट बोलँड, अॅलेक्स कॅरी, कॅमेरून ग्रीन, जोश हेझलवूड, ट्रॅव्हिस हेड, जोश इंग्लिस, मार्नस लॅबुशेन, नॅथन लायन, मॅथ्यू रेनशॉ, स्टीव्ह स्मिथ, मिचेल स्टार्क आणि ब्यु वेबस्टर यांचा समावेश आहे.
दोन सामन्यांच्या या कसोटी मालिकेतील पहिल्या सामन्यात बांगलादेशने डार्विनच्या मैदानावर ऑस्ट्रेलियाचा धुव्वा उडवत नवा इतिहास रचला. ऑस्ट्रेलियन भूमीवर बांगलादेशचा हा पहिलाच कसोटी विजय ठरला; तर २०१७ मधील मिरपूर कसोटीनंतर ऑस्ट्रेलियाविरुद्धचा त्यांचा हा केवळ दुसराच कसोटी विजय आहे. या सामन्यात ऑस्ट्रेलियाचा पहिला डाव अवघ्या १९८ धावांत आटोपला होता, ज्याला चोख प्रत्युत्तर देत बांगलादेशने पहिल्या डावात ४२६ धावांचा डोंगर उभा केला. दुसऱ्या डावातही कांगारूंची फलंदाजी ढेपाळली आणि संपूर्ण संघ २८४ धावांत गारद झाला. विजयासाठी मिळालेले अवघ्या ५७ धावांचे सोपे आव्हान बांगलादेशने अवघा एक गडी गमावून सहज पार केले आणि मालिकेत १-० अशी आघाडी घेतली.
