मेलबर्न : पुढारी ऑनलाईन
जगातील अव्वल टेनिसपटू नोव्हाक जोकोव्हिच (Novak Djokovic) याला ऑस्‍ट्रेलियाच्‍या न्‍यायालयाने आज मोठा दिलासा दिला. त्याचा व्हिसा रद्द करण्‍याचा निर्णय चुकीचा होता, असे मेलबर्न न्‍यायालयाने स्पष्ट केले आहे. नोव्हाक जोकोव्हिच याला व्हिसा व जप्‍त केलेले साहित्‍य तात्‍काळ परत करावे, असा आदेशही न्‍यायालयाने ऑस्‍ट्रेलियाच्‍या सरकारला दिला आहे.
व्हिसा प्रकरणाची केस जिंकल्‍यामुळे जोकोव्हिच हा ऑस्ट्रेलियन ओपन स्पर्धा खेळणार असल्याचे स्पष्ट झाले आहे. दरम्यान, जोकोव्हिच याला ऑस्‍ट्रेलियातून बाहेर काढले जाईल, यावर लवकरच निर्णय घेतला जाईल, असे न्‍यायालयाच्‍या आदेशानंतरही ऑस्ट्रेलिया सरकारमधील मंत्री म्‍हणाले आहेत.
ऑस्ट्रेलियन ओपन स्पर्धेसाठी जोकिव्‍हिच मेलबर्नमध्‍ये आला होता. ऑस्ट्रेलियामध्ये प्रवेश करण्यासाठी योग्य कायदेशीर प्रक्रिया पार पडली नसल्याचे ऑस्ट्रेलियन बॉर्डर फोर्सने स्पष्ट केले होते. तसेच मार्गदर्शक तत्त्वांनुसार, COVID-19 प्रतिबंधक लसीकरण न केलेल्या लोकांनी देशाच्या सीमेवर पुरावे सादर करणे आवश्यक आहे. याच आधारे ऑस्ट्रेलियाने जगातील अव्वल टेनिसपटू नोव्हाक जोकोव्हिचचा व्हिसा रद्द केला, असे ऑस्ट्रेलियाचे आरोग्यमंत्री ग्रेग हंट यांनी स्पष्ट केले होते. ऑस्ट्रेलियाने त्याला व्हिसा नाकारला आहे. पण जोकोव्हिचने ऑस्ट्रेलियाने त्याचा व्हिसा रद्द करण्याला कायदेशीर आव्हान देण्याचा निर्णय घेतला होता.
जोकोव्हिचमुळे (Novak Djokovic) ऑस्ट्रेलियात वाद निर्माण झाला आहे. ऑस्ट्रेलियात आणि ऑस्ट्रेलियन ओपन स्पर्धेसाठी (Australian Open) येणाऱ्या सर्वांना कोविड लसीकरणाचे आवश्यक डोस घेणे सक्तीचे करण्यात आले आहे. पण जोकोव्हिचला कोविड लसीकरणाच्या या नियमातून सूट देण्यात आली होती. जोकोव्हिचला कोणत्या आधारावर सूट देण्यात आली, असा सवाल ऑस्ट्रेलियातील लोकांनी उपस्थित करत सरकारच्या निर्णयाला जोरदार विरोध केला आहे. याच दरम्यान ५ जानेवारी रोजी जोकोव्हिचचे मेलबर्न विमानतळावर आगमन झाले होते. पण त्याला विमानतळाबाहेर जाण्यासाठी परवानगी देण्यात आली नाही. कारण त्याने व्हिसा अर्जावर चूक केली होती.
ऑस्ट्रेलिया मीडियातील वृत्तानुसार, जोकोव्हिचने व्हिसाच्या ज्या कॅटेगरीमधून अर्ज केला होता; त्यात कोविड लसीकरणाबाबत सूट देण्याची तरतूद नाही. जोकोव्हिचची ही चूक ऑस्ट्रेलियन बॉर्डर फोर्सने निदर्शनास आणून दिली. जोकोव्हिचने २०२० मध्ये लसीकरणाला विरोध केला होता. दरम्यान, ऑस्ट्रेलिया ओपन आयोजकांनी मंगळवारी जारी केलेल्या निवेदनातून जोकोव्हिचला स्पर्धेत भाग घेण्यासाठी वैद्यकीय सूट देण्यात आल्याचे जाहीर केले होते. जोकोव्हिचने वैद्यकीय सूट मिळण्याबाबत जो अर्ज केला आहे तो मिळाला आहे. आरोग्य क्षेत्रातील तज्ज्ञांशी सल्लामसलत केल्यानंतर हा निर्णय घेतला असल्याचे आयोजकांनी स्पष्ट केले होते. ऑस्ट्रेलिया ओपन स्पर्धा १७ जानेवारी पासून सुरु होत आहे.
