Pan Masala Ad Controversy: बॉलिवूडचे सुपरस्टार शाहरुख खान, अजय देवगण आणि टायगर श्रॉफ पुन्हा एकदा पान मसाला जाहिरातीमुळे चर्चेत आले आहेत. राजस्थानमधील बारां जिल्हा ग्राहक न्यायालयाने या तिघांसह विमल पान मसालाचे मालक विमल अग्रवाल यांना नोटीस बजावून 9 जुलै रोजी हजर राहण्याचे आदेश दिले आहेत.
विमल पान मसालाच्या जाहिरातीत करण्यात आलेल्या 'दाणे-दाणे मैं केशर का दम' या दाव्याबाबत ग्राहकांची दिशाभूल केल्याचा आरोप करण्यात आला आहे. या प्रकरणी दाखल करण्यात आलेल्या तक्रारीची दखल घेत न्यायालयाने संबंधितांना नोटीस पाठवली आहे.
तक्रारदाराचा दावा आहे की, बाजारात अत्यंत महाग मानल्या जाणाऱ्या केशराचा वापर काही रुपयांच्या पान मसाल्यात असल्याचा दावा केला जातो. मात्र हा दावा वास्तवाशी विसंगत असून ग्राहकांची फसवणूक करणारा आहे. या जाहिरातींमुळे ग्राहकांना उत्पादनाबाबत चुकीची माहिती दिली जाते आणि प्रसिद्ध कलाकारांच्या प्रभावामुळे लोक अशा उत्पादनांकडे आकर्षित होतात, असा आरोप करण्यात आला आहे.
विशेष म्हणजे पान मसाला आणि गुटखा उत्पादनांच्या जाहिरातींबाबत यापूर्वीही अनेकदा वाद निर्माण झाले आहेत. आरोग्यासाठी घातक मानल्या जाणाऱ्या उत्पादनांच्या थेट जाहिरातींवर निर्बंध असल्याने अनेक कंपन्या 'सरोगेट अॅडव्हर्टायझिंग'चा वापर करत असल्याचा आरोप वारंवार केला जातो.
या प्रकरणात न्यायालयाने शाहरुख खान, अजय देवगण, टायगर श्रॉफ आणि विमल अग्रवाल यांना 9 जुलै रोजी न्यायालयासमोर आपली बाजू मांडण्यास सांगितले आहे. संबंधितांना स्वतः किंवा त्यांच्या वकिलामार्फत न्यायालयात उपस्थित राहावे लागणार आहे.
दरम्यान, पान मसाला जाहिरातींमध्ये मोठ्या बॉलिवूड कलाकारांच्या सहभागावर यापूर्वीही प्रश्नचिन्ह उपस्थित करण्यात आले होते. समाजातील अनेक संघटना आणि आरोग्य क्षेत्रातील तज्ज्ञांनी अशा जाहिरातींवर टीका केली आहे. काही कलाकारांनी जनतेच्या टीकेनंतर अशा जाहिरातींपासून दूर राहण्याचा निर्णयही घेतला होता.
आता 9 जुलै रोजी होणाऱ्या सुनावणीत शाहरुख खान, अजय देवगण, टायगर श्रॉफ आणि कंपनी व्यवस्थापनाकडून कोणते स्पष्टीकरण दिले जाते, याकडे सर्वांचे लक्ष लागले आहे. या प्रकरणाचा निकाल केवळ संबंधित कलाकारांसाठीच नव्हे, तर भ्रामक जाहिराती आणि सेलिब्रिटी एंडोर्समेंट्सच्या भविष्यासाठीही महत्त्वाचा ठरू शकतो.
