120 Bahadur Box Office Collection Day 1: बॉक्स ऑफिसवर या आठवड्यात काही नव्या चित्रपटांची एन्ट्री झाली असून त्यामध्ये सर्वाधिक चर्चा होत आहे ती फरहान अख्तर यांच्या हिस्टोरिकल वॉर फिल्म ‘120 बहादुर’ची. याच दिवशी कॉमेडी एंटरटेनर ‘मस्ती 4’ चित्रपटही प्रदर्शित झाला आहे. मात्र मोठी आणि दमदार कमाई करणारी कोणतीही फिल्म सध्या थिएटर्समध्ये नसल्याने ‘120 बहादुर’ला प्रेक्षकांना आकर्षित करण्याची मोठी संधी आहे.
देशाला अभिमान वाटेल अशी कथा सांगणारा हा चित्रपट बिग बजेटमध्ये बनवला आहे. त्यामुळे निर्मात्यांसाठी पहिला आठवडा अत्यंत महत्त्वाचा आहे. आगामी दिवसांत काही मोठ्या फिल्म्स रिलीज होणार असल्याने पहिले दोन विकेन्डच या चित्रपटाचे भविष्य ठरवणार आहेत.
रिलीजपूर्वी झालेल्या पेड प्रीमियरमधून सुमारे 10 लाखांची कमाई झाली आहे. त्यानंतर चित्रपटाने ओपनिंग डेवर भारतात 2.35 कोटींची कमाई केली आहे. अशा प्रकारे पहिल्या दिवसापर्यंतचे एकूण कलेक्शन 2.45 कोटींच्या आसपास पोहोचले आहे.
रिपोर्ट्सनुसार चित्रपटाचे बजेट साधारण 80 कोटी इतके आहे. त्यामुळे पहिल्या दिवसाची कामगिरी किंचित निराशाजनक म्हणावी लागेल. आता विकेन्डला कलेक्शनमध्ये वाढ होणे, हे चित्रपटासाठी आवश्यक आहे.
‘120 बहादुर’ची कथा 1962 मधील रेजांगला युद्धावर आधारित आहे. या ऐतिहासिक युद्धात भारतीय जवानांनी दाखवलेल्या पराक्रमाचे चित्रपटात प्रभावी चित्रण करण्यात आले आहे. फरहान अख्तर मेजर शैतान सिंह यांची भूमिका साकारत आहेत. तर चित्रपटाचे दिग्दर्शन रजनीश घई यांनी केले असून, लीड अभिनेत्री म्हणून राशी खन्नाला संधी मिळाली आहे.
पहिल्या दिवसाची गती संथ असली तरी हिस्टोरिकल वॉर हा विषय आणि दमदार स्टारकास्टमुळे चित्रपटाला अजूनही चांगली संधी आहे. आता प्रेक्षकांचा पाठिंबा आणि विकेन्डची कमाई ‘120 बहादुर’चे यश ठरवणार आहे.
