bollywood hanuman ansh most profitable film 2026-left behind dhurandhar awarapan toxic
पुढारी ऑनलाईन : 2026 मधील सर्वाधिक नफा कमावणारा चित्रपट ठरला आहे. अवघ्या 2 कोटी रुपयांच्या बजेटमध्ये बनलेल्या या चित्रपटाने 42 कोटी रुपयांचा टप्पा ओलांडला आहे. नफ्याच्या बाबतीत रणवीर सिंहच्या ‘धुरंधर 2’सह अनेक मोठ्या चित्रपटांनाही या सिनेमाने मागे टाकले आहे. जाणून घेऊया या चित्रपटाचे नाव.
2026 मध्ये मोठ्या बजेटचे अनेक चित्रपट प्रदर्शित झाले. यातील काही चित्रपटांनी बॉक्स ऑफिसवर दमदार कमाई केली, तर काहींना आपले बजेटही वसूल करता आले नाही. मात्र, याच वर्षी असा एक चित्रपट प्रदर्शित झाला आहे, ज्याच्या नफ्याने रणवीर सिंहच्या ‘धुरंधर’लाही मागे टाकले आहे. या चित्रपटाचे नाव ‘हनुमान अंश’ असून तो नीम करोली बाबा यांच्या जीवनावर आधारित आहे. अतिशय कमी बजेटमध्ये बनलेल्या या चित्रपटाने आपल्या बजेटच्या तब्बल 20 पट कमाई केली आहे.
‘हनुमान अंश’चे बजेट
हनुमान भक्तीवर आधारित ‘हनुमान अंश’ हा चित्रपट नीम करोली बाबा यांच्या जीवनावर आधारित आहे. रिपोर्टनुसार, हा चित्रपट केवळ 2 कोटी रुपयांच्या बजेटमध्ये तयार करण्यात आला आहे. चित्रपटाच्या प्रमोशनसाठी स्वतंत्र बजेट नव्हते. त्यामुळे अनेक ठिकाणी भंडाऱ्याचे आयोजन करून लोकांपर्यंत चित्रपटाची माहिती पोहोचवण्यात आली.
चित्रपटात कोणताही मोठा स्टार नाही. छोट्या कलाकारांच्या अभिनयासह अत्यंत कमी बजेटमध्ये तयार झालेला हा सिनेमा प्रेक्षकांची मने जिंकत आहे. ‘हनुमान अंश’ 7 ऑगस्ट रोजी थिएटरमध्ये प्रदर्शित झाला होता. सुरुवातीला या चित्रपटाबद्दल फारशी चर्चा नव्हती, मात्र नंतर चित्रपटाने बॉक्स ऑफिसवर दमदार कमाई करण्यास सुरुवात केली.
‘हनुमान अंश’ची आतापर्यंतची कमाई
प्रदर्शनाच्या वेळी ‘हनुमान अंश’ला मोजकेच शो आणि कमी प्रेक्षक मिळाले. पहिल्या वीकेंडमध्ये चित्रपटाने केवळ 60 लाख रुपयांची कमाई केली. मात्र, चौथ्या वीकेंडमध्ये चित्रपटाने तब्बल 28 कोटी रुपयांची कमाई करत सर्वांनाच आश्चर्यचकित केले.
केवळ 2 कोटी रुपयांच्या बजेटमध्ये तयार झालेल्या या चित्रपटाने आतापर्यंत बॉक्स ऑफिसवर 42 कोटी रुपयांची नेट कमाई केली आहे. लवकरच हा चित्रपट 50 कोटींचा आकडा पार करू शकतो. इंडस्ट्रीतील सूत्रांच्या मते, ‘हनुमान अंश’चा लाइफटाइम कलेक्शन 100 कोटी रुपयांपर्यंत पोहोचू शकतो. असे झाल्यास हा भारतीय सिनेमातील सर्वाधिक नफा कमावणाऱ्या चित्रपटांपैकी एक ठरू शकतो.
‘हनुमान अंश’ला जबरदस्त नफा
‘हनुमान अंश’ सध्या बॉक्स ऑफिसवर तब्बल 2000 टक्के नफ्यासह कमाई करत असल्याचा दावा केला जात आहे. आगामी काळात चित्रपटाचे कलेक्शन वाढल्यास त्याचा नफा 5000 टक्क्यांपर्यंत पोहोचू शकतो.
रणवीर सिंहच्या ‘धुरंधर 2’च्या नफ्याबद्दल बोलायचे झाल्यास, या चित्रपटाने सुमारे 1000 टक्के नफ्यासह कमाई केली होती. या चित्रपटामागे मोठे बजेट, मोठे कलाकार आणि पहिल्या ‘धुरंधर’ चित्रपटाशी असलेला संबंध यांसारख्या गोष्टी होत्या. मात्र, ‘हनुमान अंश’ने या सर्व मोठ्या चित्रपटांना मागे टाकत कमी बजेटमध्ये जबरदस्त नफा कमावला आहे.
नीम करोली बाबा यांचे सेलिब्रिटी भक्त
‘हनुमान अंश’ची कथा लक्ष्मण दास यांच्या जीवनावर आधारित आहे, जे पुढे जाऊन नीम करोली बाबा म्हणून प्रसिद्ध झाले. ते हनुमानाचे महान भक्त मानले जातात. देशातील अनेक प्रसिद्ध व्यक्ती नीम करोली बाबा यांचे भक्त आहेत.
क्रिकेटपटू विराट कोहली, अभिनेत्री अनुष्का शर्मा यांच्यासह अनेक सेलिब्रिटी बाबा यांना मानतात. तसेच अॅपलचे सहसंस्थापक स्टीव्ह जॉब्स हेदेखील नीम करोली बाबा यांचे भक्त होते, असे सांगितले जाते.
नीम करोली बाबा यांच्या जीवनावर आधारित या चित्रपटाने बॉक्स ऑफिसवर चौथ्या आठवड्यात अनपेक्षितपणे मोठी झेप घेत चमत्कार घडवला आहे.
