‘कारभारी लयभारी’ फेम अनुष्का सरकटे आता मराठी चित्रपटसृष्टीत पदार्पण करत असून ती लवकरच एका रोमँटिक भूमिकेत रुपेरी पडद्यावर झळकणार आहे. लोकप्रिय अभिनेत्यासोबत तिची जोडी पाहायला मिळणार असून, या नव्या प्रोजेक्टमुळे अनुष्काच्या करिअरला नवी दिशा मिळेल, अशी अपेक्षा व्यक्त केली जात आहे.
Anushka Sarkate new upcoming marathi movie
'कारभारी लयभारी' या छोट्या पडद्यावरील मालिकेमधून महाराष्ट्राच्या घराघरांत पोहोचलेली अभिनेत्री अनुष्का सरकटे आता मोठ्या पडद्यावर झळकणार आहे. आयुष संजीव आणि अनुष्का सरकटे ही लोकप्रिय जोडी आता ‘जब्राट’ या चित्रपटातून रोमँटिक अंदाजात मराठी रुपेरी पडद्यावर झळकणार आहे. मालिकेनंतर ही जोडी पुन्हा कधी एकत्र दिसणार? याकडे प्रेक्षकांचं लक्ष लागलं होतं.
मिळालेल्या माहितीनुसार, अनुष्का सरकटे आगामी मराठी चित्रपटात प्रमुख भूमिकेत झळकणार असून या सिनेमात ती एका लोकप्रिय मराठी अभिनेत्यासोबत रोमँटिक अंदाजात दिसणार आहे. या नव्या जोडीबद्दल सध्या सिनेसृष्टीत उत्सुकता निर्माण झाली असून, सोशल मीडियावरही या चित्रपटाची चर्चा सुरू आहे.
तारा करमणूक निर्मित, प्रगती कोळगे दिग्दर्शित ‘जब्राट’ या चित्रपटात प्रिन्स आणि निशा ही पात्रे पाहायला मिळणार आहेत. या दोन व्यक्तिरेखेतून लव्हेबल केमिस्ट्री पाहायला मिळणार आहे.
कधी रिलीज होणार जब्राट चित्रपट?
नवीन वर्षात येत्या ६ फेब्रुवारीला हा चित्रपट प्रेक्षकांच्या भेटीला येणार आहे. नुकतेच या चित्रपटाचे शानदार पोस्टर आणि चित्रपटातली ‘तू आणि मी’ हे त्यांचे रोमँटिक गाणंही प्रदर्शित झालं आहे.
चित्रपटात मनोरंजनाचा तडका पाहायला मिळणार आहे. ‘लव्ह, म्युझिक, मस्ती आणि डान्स’ असा मसाला पाहायला मिळणार आहे. चित्रपटात कॉलेज विश्वातील दुनियादारी अत्यंत वेगळी आणि भावस्पर्शी पाहायला मिळणार आहे.
'हे' असतील कलाकार
आयुष संजीव, अनुष्का सरकटे या जोडीसोबत वनिता खरात, श्रेया शंकर, राहुल चव्हाण, डॉ. ऋषभ गायकवाड, सोहम कांबळे, पुण्यकर उपाध्याय, आयली घिया, हिंदवी पाटील, मंदार मोकाशी, संजय मोने, सुरेखा कुडची, विक्रम आल्हाट, प्रगती कोळगे, जयवंत वाडकर, गणेश यादव हे कलाकार दिसणार आहेत.
‘जब्राट’ चित्रपटाचे निर्माते अनिल अरोडा, गोविंद मोदी, प्रगती कोळगे आहेत. छायांकन अनिकेत खंडागळे, सहाय्यक असोसिएट चार्लेस गोम्स, नृत्यदिग्दर्शक आशिष पाटील, वेशभूषा युगेशा ओमकार यांची आहे. डॉ. जयभीम शिंदे यांनी संगीत दिले आहे. तर बेला शेंडे, आर्या आंबेकर, वैशाली माडे, नंदेश उमप, डॉ. जयभीम शिंदे, राजनंदिनी मगर, स्वाती शिंदे, अनुराग जगदाळे, स्वराज्य भोसले यांनी गाण्यांना स्वरसाज चढवला आहे.
