पुढारी ऑनलाईन डेस्क :
मास्टर दीनानाथ मंगेशकर स्मृती प्रतिष्ठानचा पहिला लता मंगेशकर पुरस्कार देशाचे पंतप्रधान नरेंद्र मोदी यांना जाहीर झाला आहे. हा पुरस्कार सोहळा उद्या (दि. 24 एप्रिल) मुंबईत पार पडणार आहे. या पुरस्कार सोहळ्याला राज्यातील दिग्गज नेत्यांची उपस्थिती असणार आहे. राज्याचे मुख्यमंत्री उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हेही यावेळी अपस्थित असतील अशी चर्चा आहे. त्यामुळे हे तिन्ही दिग्गज नेते उद्या एकाच व्यासपीठावर एकत्र येणार असल्याची माहिती समोर येत आहे.
मास्टर दिनानाथ प्रतिष्ठान आणि मंगेशकर कुटुंबीयांकडून कला क्षेत्रात उत्तम कामगिरी करणाऱ्या कलावंतांचा सन्मान केला जातो. गेल्या ३२ वर्षांपासून हा सोहळा पार पडत आहे. उद्याचा पुरस्कार सोहळा षण्मुखानंद हॉलमध्ये आयोजित केला आहे. उद्या संध्याकाळी सोहळा पार पडणार आहे. दरम्यान, लता मंगेशकर यांच्या नावे दिला जाणारा पहिला पुरस्कार देशाचे पंतप्रधान नरेंद्र मोदी यांना जाहीर झाला असून तो स्वीकारण्यासाठी पीएम मोदी उद्या मुंबईत येत आहेत. या सोहळ्यासाठी राज्याचे मुख्यमंत्री उद्धव ठाकरे तसेच महाराष्ट्र नवनिर्माण सेनेचे प्रमुख राज ठाकरे यांना आमंत्रण देण्यात आले आहे. राज्यातील हे दोघे दिग्गज नेते उद्याच्या सोहळ्याला उपस्थित राहण्याची शक्यता आहे. त्यामुळे पंतप्रधान मोदी आणि उद्धव व राज ठाकरे एकाच मंचावर दिसतील असा अंदाज व्यक्त केला जात आहे.
