पिंपरी: वाकड येथील शिल्पा गवारे आत्महत्या प्रकरणाचा पोलिसांकडून तपास सुरू असून, लवकरच न्यायालयात आरोपपत्र दाखल करण्यात येईल. या गुन्ह्यात अटक केलेल्या सासरच्या मंडळींना अद्याप जामीन मिळालेला नाही, अशी माहिती राष्ट्रीय महिला आयोगाच्या अध्यक्षा विजया रहाटकर यांनी दिली. मंगळवार (दि. १३) शिल्पा यांच्या माहेरच्या मंडळींची भेट घेतल्यानंतर त्या प्रसार माध्यमांशी बोलत होत्या.
शिल्पा सचिन गवारे यांनी २७ ऑगस्ट २०२६ रोजी वाकड येथील राहत्या घरी गळफास घेऊन आत्महत्या केल्याची घटना उघडकीस आली होती. याप्रकरणी त्यांचे भाऊ संतोष कलाटे यांनी वाकड पोलिस ठाण्यात फिर्याद दिली. त्यानुसार शिल्पा यांचे पती सचिन उत्तम गवारे यांच्यासह सासरच्या चार जणांना पोलिसांनी अटक केली.
सर्व आरोपी सध्या न्यायालयीन कोठडीत आहेत. दरम्यान, शिल्पा यांची आत्महत्या नसून घातपात झाल्याचा आरोप माहेरच्या मंडळींनी केला आहे. मुख्यमंत्री देवेंद्र फडणवीस यांनीही कलाटे कुटुंबीयांशी दूरध्वनीवरून संवाद साधत हा खटला जलदगती न्यायालयात चालविण्याचे आश्वासन दिले आहे.
या पार्श्वभूमीवर रहाटकर यांनी कलाटे कुटुंबीयांची भेट घेऊन प्रकरणाची माहिती घेतली. या वेळी चिंचवडचे आमदार शंकर जगताप, नगरसेविका स्नेहा कलाटे, संतोष कलाटे, रणजित कलाटे उपस्थित होते. पोलिसांकडून प्रकरणातील सर्व बाबींची नोंद घेऊन पुराव्यांच्या आधारे आरोपपत्र तयार केले जाईल. कायद्यातील तरतुदी आणि लावण्यात आलेल्या कलमांवर आरोपींच्या जामिनाचा निर्णय अवलंबून असतो, असे रहाटकर यांनी स्पष्ट केले.
हुंड्यासाठी त्रास दिला जाणे दुर्दैवी
हुंड्याच्या नावाखाली महिलांचा होणारा छळ ही गंभीर सामाजिक समस्या बनत असल्याबद्दल रहाटकर यांनी चिंता व्यक्त केली. समाज आधुनिकतेकडे वाटचाल करीत असताना महिलांना हुंड्यासाठी त्रास दिला जाणे दुर्दैवी आहे. अशा घटना रोखण्यासाठी केवळ कायद्याची अंमलबजावणी पुरेशी नसून समाजाची मानसिकताही बदलण्याची गरज आहे. महिलांवरील अत्याचारांविरोधात नागरिकांनी पुढे येऊन आवाज उठवला पाहिजे, असे आवाहन त्यांनी केले.
