पिंपरी : पिंपरी-चिंचवड महापालिकेच्या करसंकलन विभागामार्फत मालमत्ताकर वसुली मोहिमेला गती देण्यात आली आहे. थकबाकीदारांवर जप्तीची कारवाई सुरू आहे. आतापर्यंत 27 निवासी व बिगरनिवासी मालमत्तांची जप्ती करण्यात आली आहेत. तसेच, नळजोड तोडण्यात आले आहेत. ऐन दिवाळीत जप्ती कारवाई सुरू केल्याने थकबाकीदारांचे धाबे दणाणले आहेत.(Latest Pimpri chinchwad News)
थकबाकीदारांना नोटिसा बजावण्यात आल्या आहे. विविध ठिकाणी थेट मालमत्तांवर जप्तीची कारवाई करण्यासाठी करसंकलन विभागाच्या 18 विभागीय कार्यालयांमार्फत कारवाई सुरू आहे. महापालिकेकडून वारंवार आवाहन करुनही तसेच, नोटीस देऊनदेखील मालमत्ताकर न भरणाऱ्या मालमत्ताधारकांची मालमत्ता जप्त करण्याचे आदेश अतिरिक्त आयुक्त प्रदीप जांभळे पाटील व सहायक आयुक्त अविनाश शिंदे यांनी सर्व 18 विभागीय कार्यालयांना दिले आहेत. ही मोहीम पुढील महिनाभर व्यापक स्वरूपात राबविण्यात येणार आहे. मालमत्ताकर थकबाकी असणाऱ्या थकबाकीदारांवर कारवाई केली जाणार आहे.
शहरातील निवासी व बिगरनिवासी थकबाकीदारांवर कारवाई सुरू केली आहे. एक ऑक्टोबरपासून विभागीय कार्यालयातील पथकांनी थकबाकीदारांच्या मालमत्तांना भेट देऊन जप्ती प्रक्रिया सुरू केली आहे. दिवसभरात 18 विभागीय कार्यालयांतर्गत 18 पथके वसुली मोहीम राबवत आहेत. आतापर्यंत 27 मालमत्ता सील करण्यात आले असून, काही मालमत्ताधारकांचे नळ जोड तोडण्यात आले आहेत. कारवाईदरम्यान 125 थकबाकीदारांनी तात्काळ बिलाचा भरणा करून मालमत्तेवरील कारवाई टाळली आहे.
महापालिकेने करवसुलीबाबत कठोर भूमिका घेतली आहे. थकबाकीदारांना वारंवार सूचना देऊनही मालमत्ताकर न भरल्यास महापालिकेस जप्ती कारवाई करणे भाग पडणार आहे. विभागीय कार्यालयांना याबाबत स्पष्ट निर्देश दिले असून, थकबाकीदारांनी तात्काळ मालमत्ताकराची थकीत रक्कम भरुन सहकार्य करावे.
अविनाश शिंदे, सहायक आयुक्त, महापालिका
थकबाकीदारांकडून कर वसुलीसाठी महापालिकेकडून मोठ्या प्रमाणावर कारवाई सुरू करण्यात आली आहे. या कारवाईत कोणत्याही प्रकारची शिथिलता ठेवली जाणार नाही. मालमत्ता कर थकबाकीदारावरांवर मालमत्ता जप्ती, नळजोड तोडण्याची कारवाई सुरू करण्यात आली आहे.
प्रदीप जांभळे पाटील, अतिरिक्त आयुक्त, महापालिका
