पिंपरी: पिंपरी-चिंचवड शहरातील रस्त्यांवरील खड्डे बुजविण्याची मोहीम महापालिकेच्या स्थापत्य विभागामार्फत वेगाने सुरू आहे. नागरिक, लोकप्रतिनिधी व विविध माध्यमांतून येणार्या तक्रारींची तातडीने दखल घेतली जात आहे.
संबंधित क्षेत्रीय कार्यालयामार्फत पाहणी करून आवश्यकतेनुसार खड्डे बुजविण्याचे काम केले जात आहे. शहरात रस्त्यांवरील खड्ड्यांबाबत आतापर्यंत २ हजार १६४ तक्रारी प्राप्त झाल्या असून, त्यापैकी १ हजार ६०९ खड्डे बुजविण्यात आले आहेत. उर्वरित ५५५ खड्ड्यांची डागडुजी सुरू आहे, असा दावा स्थापत्य विभागाने मंगळवार (दि. ११) केला आहे.
स्थापत्य विभागामार्फत शहरातील विविध रस्त्यांची देखभाल व दुरुस्ती केली जाते. खड्ड्यांबाबत तक्रार प्राप्त झाल्यानंतर संबंधित क्षेत्रीय कार्यालयाचे पथक त्या ठिकाणी जाऊन पाहणी करते. खड्ड्याचा आकार, खोली, रस्त्याची स्थिती, वाहतुकीची वर्दळ व पावसाची परिस्थिती याचा विचार करून दुरुस्तीसाठी योग्य साहित्य निवडले जाते. त्यानंतर खड्डा बुजवला जातो. आतापर्यंत बुजविण्यात आलेल्या १ हजार ६०९ खड्ड्यांपैकी ५५६ खड्डे कोल्ड मिक्स, २३ बीबीएम, ७५४ जीएसबी, १२० पेव्हिंग ब्लॉक आणि १५६ खड्डे काँक्रीटच्या माध्यमातून बुजविण्यात आले आहेत.
तक्रारींकडे दुर्लक्ष करणार्या अभियंत्यांवर कारवाई करणार
रस्त्यांवरील खड्डे बुजविण्याबाबत संबंधित यंत्रणांना सक्त सूचना देण्यात आल्या आहेत. प्राप्त तक्रारींचे वेळेत निराकरण करण्याची जबाबदारी संबंधित कार्यकारी अभियंत्यांची आहे. विभागप्रमुखांनी या कामावर नियमित नियंत्रण ठेवण्याबाबत तसेच, तक्रारींकडे दुर्लक्ष करणार्या अभियंत्यांविरुद्ध नियमानुसार कारवाई प्रस्तावित करण्याबाबत सूचना देण्यात आल्या आहेत, असे आयुक्त डॉ. विजय सूर्यवंशी यांनी सांगितले.
दोषी ठेकेदारांवर कारवाई करणार
पावसाळ्यात रस्ते व डांबराचे साहित्य ओलसर असल्याने डांबरीकरणासाठी आवश्यक गुणवत्ता मिळत नाही. त्यामुळे सध्या नागरिकांची गैरसोय कमी करण्यासाठी तात्पुरत्या स्वरूपात खड्डे बुजविण्याचे काम सुरू आहे. पावसाळा संपल्यानंतर, डांबर प्लांट सुरू झाल्यावर पावसाळ्यात तात्पुरती दुरुस्ती केलेल्या ठिकाणांची पुन्हा पाहणी केली जाईल. आवश्यकतेनुसार या ठिकाणी कायमस्वरूपी डांबरीकरण करण्यात येणार आहे. दोषदायित्व कालावधी लागू असलेल्या रस्त्यांवर खड्डे पडल्यास संबंधित ठेकेदारामार्फतच दुरुस्ती करून घेण्यात येणार आहे. दुरुस्ती करण्यास टाळाटाळ करणार्या ठेकेदारांवर कारवाई करण्यात येणार आहे, असे मुख्य अभियंता प्रमोद ओंभासे यांनी सांगितले.
