पिंपरी: पिंपरी-चिंचवडमध्ये ऑक्टोबर हिटने कहर केला आहे. शहराचे कमाल तापमान बुधवार (दि. ७) ३६ अंशावर पोचले असून, येत्या ३ दिवसांत ते ३७ अंशांपर्यंत जाण्याची शक्यता हवामान विभागाने वर्तवली आहे.
गेल्या आठवड्यात शहरात ३५.७ अंश तापमानाची नोंद झाली होती, त्यानंतर सातत्याने पारा चढतच आहे. सकाळी ९ वाजल्यापासूनच कडक ऊन आणि दमट हवामानामुळे नागरिक हैराण झाले आहेत. हवामान विभागाच्या माहितीनुसार आर्द्रता ७० टक्क्यांपेक्षा जास्त असल्याने प्रत्यक्ष तापमान ३५ अंश असले तरी ३८ ते ३९ अंशापेक्षा जास्त गरम जाणवत आहे.
वाकड, हिंजवडी, भोसरी, निगडी, चिंचवड या आयटी आणि औद्योगिक पट्ट्यात उन्हाचा सर्वाधिक फटका बसत आहे. दुचाकीस्वार, बांधकाम कामगार, शाळेतील विद्यार्थी आणि बाजारात खरेदीसाठी येणाऱ्या नागरिकांना उन्हाचा मोठा त्रास सहन करावा लागत आहे.
पुढील ४ दिवस शहरात अशीच स्थिती कायम राहणार असून, हवामान प्रामुख्याने निरभ्र आणि कोरडे राहील. दुपारी १२ ते ४ या वेळेत बाहेर जाणे टाळण्याचा सल्ला डॉक्टर देत आहेत. वाढत्या उष्णतेमुळे डोळ्यांची जळजळ, त्वचेवर पुरळ आणि डीहायड्रेशनचे रुग्ण वाढले आहेत.
राज्यात एल-निनोचा प्रभाव वाढत असल्याने यंदा ऑक्टोबर हीट अधिक तीव्र राहण्याची शक्यता आहे. नागरिकांनी पुरेसे पाणी प्यावे, सुती कपडे वापरावे आणि शक्यतो सावलीत राहावे, असे आवाहन वैद्यकीय तज्ज्ञांनी केले आहे.
