मिलिंद कांबळे
पिंपरी : पिंपरी-चिंचवड महापालिकेच्या निवडणुकीसाठी अनुसूचित जाती (एससी), अनुसूचित जमाती (एसटी), इतर मागासवर्ग (ओबीसी) तसेच, खुल्या (ओपन) गटातील या सर्व राखीव जागांवर महिलांसाठी असलेल्या जागेसाठी आरक्षण सोडत चक्राकार पद्धतीने काढण्यात येणार आहे. त्यात कोणत्या प्रभागात महिला आरक्षण पडणार याची उत्सुकता निर्माण झाली आहे. तर, दोन किंवा तीन प्रभागातील प्रत्येकी दोन जागा या ओबीसीसाठी राखीव असणार असल्याचे सूत्रांनी सांगितले.(Latest Pimpri chinchwad News)
आरक्षण सोडतीची तयारी महापालिकेने सुरू केली आहे. चिंचवड येथील प्रा. रामकृष्ण मोरे प्रेक्षागृहात आरक्षण सोडत काढली जाईल. राज्य निवडणूक आयोगाने आखून दिलेल्या नियमानुसार सोडत काढली जाईल.
सचिन पवार, उपायुक्त, निवडणूक विभाग, असे महापालिका
महापालिकेत एकूण 128 जागा या नगरसेवकांसाठी आहेत. त्यात महापालिकेच्या जागा आणि लोकसंख्येच्या सूत्रानुसार एससीच्या 20 जागा आणि एसटीच्या 3 जागा असणार आहेत. तसेच, लोकसंख्येनुसार ओबीसीच्या जागा राखीव केल्या जाणार आहेत. तसेच, खुल्या गटातील निम्म्या जागा या महिलांसाठी आरक्षित केल्या जाणार आहेत.सर्वांत प्रथम एससीच्या 20 पैकी 10 जागेसाठी महिलांचे आरक्षण काढले जाणार आहे. महापालिका शाळेच्या विद्यार्थ्यांमार्फत पारदर्शक डॅममधून या चिठ्ठ्या काढल्या जातील. त्यानंतर एसटी आरक्षणासाठी सोडत निघेल. त्यात तीनपैकी दोन जागा या महिलांसाठी राखीव असणार आहेत. त्यातून दोन चिठ्ठ्या काढल्या जातील. त्यानंतर ओबीसी आणि त्यानंतर खुल्या गटातील महिला जागांचे आरक्षण काढले जाईल. तर, दोन किंवा तीन प्रभागात प्रत्येकी दोन जागा या ओबीसीसाठी आरक्षित असणार आहेत. प्रभागातील अ, ब, क आणि ड या चार जागा कोणाला सुटणार, एकूण 128 पैकी महिलांसाठी कोणत्या प्रभागातील जागा सुटणार, याबाबत इच्छुकांसह माजी नगरसेवक व इच्छुकांचे लक्ष लागले आहे. राखीव जागेवरील खुल्या गटात पुरुषांना लढता येते. मात्र, खुल्या गटातील जागेवर पुरुषांसोबत महिलांनाही लढता येते. तसेच, झाल्यास महिला नगरसेवकांची संख्या वाढू शकते. आरक्षण सोडतीनंतर सर्व 32 प्रभागाचे चित्र अधिक स्पष्ट होणार आहे.
यंदा आरक्षण सोडतीवर हरकती व सूचना स्वीकारण्यात येणार आहेत. आरक्षण सोडतीची तयारी करण्यात येत आहे. त्यासाठी आरक्षण सोडतीनंतर आठ दिवस हरकती व सूचना मागविण्यात येणार आहे. पिंपरी-चिंचवड महापालिकेच्या 128 पैकी एससी, एसटी, ओबीसी व ओपन गटातील किती जागा निश्चित करून त्याला मान्यता घेण्याची मुदत 4 नोव्हेंबरपर्यंत आहे. सोडतीची जाहीर सूचना 4 नोव्हेंबरला वृत्तपत्रात प्रसिद्ध करण्यात येणार आहे. आरक्षण सोडत 11 नोव्हेंबरला काढली जाणार आहे. सोडतीचा निकाल राज्य निवडणूक आयोगाच्या मान्यतेसाठी ई-मेलद्वारे 11 नोव्हेंबरला पाठवला जाणार आहे. त्यावर 17 ते 24 नोव्हेंबर या कालावधीत सूचना व हरकती मागविण्यात येणार आहेत. त्यावर निर्णय घेऊन महापालिका आयुक्त 2 डिसेंबरला आरक्षण अंतिम करणार आहेत. त्या दिवशी तो शासन राजपत्रात प्रसिद्ध केला जाणार आहे.
आरक्षण सोडत 10 ऐवजी 11 नोव्हेंबरला घेण्याचा सुधारित आदेश राज्य निवडणूक आयोगाने शुक्रवारी (दि. 31) दिला आहे. त्यानुसार, महापालिका 11 नोव्हेंबला सकाळी 11 वाजता चिंचवड येथील प्रा. रामकृष्ण मोरे प्रेक्षागृहात आरक्षण सोडत काढणार आहे. त्यासाठी जाहीर प्रकटन मंगळवारी (दि. 4) प्रसिद्ध केले जाणार आहे. सोडत प्रक्रिया निवडणूक आयोगाला सादर न करता ती ई-मेलद्वारे पाठवावी, अशा सूचना आयोगाने महापालिकेस दिल्या आहेत.
महापालिकेचे चार सदस्यीय एकूण 32 प्रभाग आहेत. प्रत्येक प्रभागात 2 जागा या महिलांसाठी राखीव असणार आहेत. त्यामुळे प्रत्येक प्रभागाचे नेतृत्व दोन नगरसेविका करणार आहेत. त्यामुळे नगरसेविका नगरसेवकांच्या बरोबरीने प्रभागात काम करणार आहेत. तसेच, महापालिका सभागृहात आपल्या प्रभागासाठी आक्रमक भूमिका घेतील.
