पिंपरी: पिंपरी-चिंचवड शहरात सलग दुसऱ्या दिवशी पारा उसळलेलाच होता. शहराचे तापमान रविवार (दि. 26) 41 अंश इतके नोंदविले गेले. रविवार सुट्टीचा दिवस असूनही तापमानाच्या चढत्या पाऱ्यामुळे रस्त्यावरील वर्दळ कमी होती.
एकंदर वाढत्या तापमानाने शहरवासीयांना घाम फुटत आहे. उन्हामुळे त्वचेची व डोळ्यांची जळजळ, डोकेदुखी, चक्कर येण्याचे प्रमाण वाढले आहे. थोडावेळ उन्हात थांबले तरी घामाच्या धारा लागत आहेत. यामुळे थंड पेय पिण्याचे प्रमाण वाढल्याने सर्दी, खोकला, तापाच्या रूग्णांची संख्या वाढली आहे.
उन्हापासून संरक्षणासाठी गॉगल, टोपी, स्कार्फ, पांढरे कपडे यांचा वापर केला जात आहे. शहरातील बंधाऱ्यांवर देखील पोहणाऱ्यांची गर्दी पहायला मिळत आहे. वाढत्या उन्हाचा प्राण्यांवर देखील परिणाम होताना दिसत आहे. प्राणी घराच्या, इमारतीच्या, झाडांच्या सावलीचा आधार घेताना दिसत आहे. ओलसर जागेत बसून शरीराला गारवा देण्याचा प्रयत्न केला जात आहे. कामानिमित्त घराबाहेर पडताना शक्यतो अंगभर कपडे घालावेत, जेणेकरून उन्हापासून शरीराचे संरक्षण होऊ शकेल. तसेच पाणी भरपूर प्यावे, असे आवाहन वैद्यकीय तज्ज्ञांकडून करण्यात येत आहे.
