पिंपरी: दहीहंडी उत्सव संपल्यानंतर स्टेजची कमान उतरविताना लोखंडी अँगल अंगावर पडून एका महिलेचा मृत्यू झाला. जुनी सांगवी येथील विघ्नहर्ता दहीहंडी मंडळाच्या कार्यक्रमस्थळी शुक्रवारी (दि. ४) रात्री पावणेअकराच्या सुमारास ही दुर्घटना घडली. मात्र, मृत महिलेच्या नातेवाईकांनी कोणतीही तक्रार नसल्याचे सांगत गुन्हा दाखल न करण्याची विनंती केली. दरम्यान, सांगवी पोलिसांनी या प्रकरणात अकस्मात मृत्यूची नोंद केली आहे. सलमा सलाउद्दीन पठाण (वय ४५) असे मृत्यू झालेल्या महिलेचे नाव आहे.
पोलिसांनी दिलेल्या माहितीनुसार, सलमा आणि त्यांचे पती सलाउद्दीन हे विघ्नहर्ता दहीहंडी मंडळाचा कार्यक्रम पाहण्यासाठी गेले होते. कार्यक्रम संपल्यानंतर दोघे तेथून निघाले. त्याचवेळी मंडळाचे कार्यकर्ते स्टेजवरील कमान उतरवत होते. कमान उतरविताना अचानक लोखंडी अँगल खाली कोसळून तो सलमा यांच्या अंगावर पडला. या दुर्घटनेत सलमा गंभीर जखमी झाल्या. त्यांना तातडीने औंध येथील रुग्णालयात नेण्यात आले. मात्र, डॉक्टरांनी उपचारापूर्वीच त्यांना मृत घोषित केले.
मंडळाविरुद्ध काही करू नका
मृत सलमा यांचा मुलगा इरफान पठाण (वय २०) हा विघ्नहर्ता दहीहंडी मंडळाचा कार्यकर्ता असल्याचे पोलिसांचे म्हणणे आहे. या दुर्घटनेनंतर इरफान याने आपली तसेच वडिलांची मंडळाविरोधात कोणतीही तक्रार नसल्याचे पोलिसांना सांगितले. तसेच पोलिसांनीही स्वतःहून मंडळाविरोधात कारवाई करू नये, अशी विनंती केल्याचे सांगण्यात आले. दरम्यान, पोलिसांनी गुन्हा दाखल न करता केवळ अकस्मात मृत्यूची नोंद केली.
मंडळच नोंदणीकृत नाही
विघ्नहर्ता दहीहंडी मंडळ नोंदणीकृत नसल्याची माहितीही समोर आली आहे. मंडळ मागील काही वर्षांपासून दहीहंडी उत्सव साजरा करीत आहे. यंदाच्या कार्यक्रमासाठी मंडळाने सांगवी पोलिसांकडे परवानगी मागितली होती. त्यावेळी पोलिसांनी तब्बल ४१ अटी व शर्तींची नोटीस बजावून कार्यक्रमाला परवानगी दिली होती.
पोलिसांच्या अटींना केराची टोपली?
कार्यक्रमासाठी उभारण्यात येणारा स्टेज मजबूत असावा, १४ वर्षांखालील गोविंदांचा सहभाग नसावा, वाहतुकीला अडथळा निर्माण होणार नाही याची खबरदारी घ्यावी, कोणत्याही धर्माच्या भावना दुखावल्या जाणार नाहीत याची दक्षता घ्यावी तसेच ध्वनिप्रदूषण होणार नाही, अशा विविध ४१ अटी पोलिसांनी घातल्या होत्या. मात्र, मंडळाने डीजे साउंड सिस्टिम आणि लेझर लाईटचा वापर करून कार्यक्रम साजरा केल्याचे नागरिक सांगतात. त्यामुळे पोलिसांनी घालून दिलेल्या अटींचे नेमके कितपत पालन झाले, स्टेज आणि कमानीच्या सुरक्षिततेची तपासणी कोणी केली आणि कार्यक्रम संपल्यानंतर कमान उतरविण्याचे काम कोणाच्या देखरेखीखाली सुरू होते, असे प्रश्न आता उपस्थित होत आहेत.
स्टेजची कमान काढताना लोखंडी अँगल अंगावर पडून महिलेचा मृत्यू झाला आहे. मृत महिलेचा मुलगा संबंधित मंडळाचा कार्यकर्ता आहे. त्यांची घटनेबाबत कोणतीही तक्रार नाही संबंधित मंडळ नोंदणीकृत नाही. कार्यक्रमाची परवानगी घेण्यासाठी ते आले असता त्यांना अटी व शर्तींची नोटीस देण्यात आली होती.
जितेंद्र कोळी, वरिष्ठ पोलिस निरीक्षक, सांगवी पोलिस ठाणे
