पिंपरी: पिंपरी-चिंचवड महापालिकेचे आठचे दहा क्षेत्रीय कार्यालय स्थापन करण्यात आले आहे. या फेररचनेमुळे तब्ब 272 कर्मचार्यांच्या अंतर्गत बदल्या करण्यात आल्या आहेत. यामध्ये लिपिक, मुख्य लिपिक, कनिष्ठ अभियंते, उपअभियंते यांचा समावेश आहे.
या बदल्यांमध्ये 75 कनिष्ठ अभियंते, 36 उपअभियंते, 103 लिपिक आणि 58 मुख्य लिपिकांचा समावेश आहे. या निर्णयामुळे क्षेत्रीय कार्यालयांपासून ते तांत्रिक व प्रशासकीय शाखांपर्यंत कामकाजाचा नवीन रचना तयार होणार आहे. त्यामुळे प्रशासन अधिक गतिमान होणार असल्याचा दावा महापालिकेने केला आहे.
महापालिकेचे आयुक्त डॉ. विजय सूर्यवंशी यांनी घेतलेल्या निर्णयानुसार 8 क्षेत्रीय कार्यालयांची फेररचना करून आता दहा क्षेत्रीय कार्यालये स्थापन करण्यात आले आहेत. एक जुलैपासून दहा क्षेत्रीय कार्यालयांनुसार कामकाज सुरू होणार आहे. त्यामुळे कर्मचार्यांच्या बदल्या करण्यात आल्या आहेत. आवश्यकतेनुसार उर्वरित कर्मचार्यांच्याही बदल्या टप्प्याटप्प्याने करण्यात येणार आहेत.
पूर्वी होती त्याच ठिकाणी अ ते ह क्षेत्रीय कार्यालयांचे कार्यालय असणार आहेत. नव्याने झालेले ज क्षेत्रीय कार्यालय हे ताथवडे येथील महापालिकेच्या वाहनतळ इमारतीमध्ये असणार आहेत. तर, ल क्षेत्रीय कार्यालय पिंपरी येथील संत तुकारामनगर पोलिस ठाण्यासमोरील म्हाडाच्या इमारतीमध्ये सुरू होणार आहे.
बांधकाम परवानगी विभाग मनोज सेठियांकडे
शहर अभियंता मकरंद निकम यांनी 28 फेब्रुवारीला सेवानिवृत्ती घेतली आहे. तेव्हापासून शहर अभियंता हे पद रिक्त आहे. त्या पदाचे कामकाज मुख्य अभियंता प्रमोद ओंभासे, सहशहर अभियंता मनोज सेठिया, सहशहर अभियंता सुनील भागवानी यांच्याकडे सोपवण्यात आले होते. सहशहर अभियंता भागवानी यांच्याकडे असेलेले बांधकाम परवानगी व अनधिकृत बांधकाम नियंत्रण विभागाचे कामकाज आता सहशहर अभियंता सेठिया यांच्याकडे सोपवण्यात आले आहे. दरम्यान, स्थापत्य विभागाचे उपअभियंता सुदर्शन वहिकर यांची कार्यकारी अभियंता म्हणून पदोन्नती करण्यात आली आहे.
