पिंपरी: पिंपरी-चिंचवड शहरातील अनधिकृत बांधकामांवर कारवाई सुरू करण्यात आली आहे. क्षेत्रीय कार्यालयाच्या पथकांनी केलेल्या कारवाईत एकूण सुमारे 83 हजार 99 चौरस फूट क्षेत्रावरील अनधिकृत बांधकाम व अतिक्रमण पाडण्यात आले. यामध्ये आरसीसी स्वरूपाची अनधिकृत बांधकामे, अनधिकृत पत्राशेड, नव्याने सुरू असलेली बांधकामे तसेच, पदपथावरील अनधिकृत टपर्या, हातगाडी व इतर अतिक्रमणांचा समावेश आहे.
अ क्षेत्रीय कार्यालयाच्या कार्यक्षेत्रातील साईनगर, निगडी परिसरात अंदाजे 3 हजार 498 चौरस फूट क्षेत्रावर कारवाई करण्यात आली. ब क्षेत्रीय कार्यालयाच्या हद्दीतील शगुन चौक, पिंपरी मार्केट, एम्पायर उड्डाण पुलाखाली चिंचवड व वाल्हेकरवाडी परिसरात 10 हजार 538 चौरस फूट क्षेत्रावरील अतिक्रमणे काढण्यात आले. क क्षेत्रीय कार्यालयाच्या अंतर्गत चिखली, कुदळवाडी, शिवरोड, रवी रंजन वजन काटा चिखली व चिंचवड डी-मार्ट शेजारील परिसरात 12 हजार 723 चौरस फूट क्षेत्रावर कारवाई करण्यात आली.
ड क्षेत्रीय कार्यालयाच्या कार्यक्षेत्रात 5 हजार 400 चौरस फूट, ई क्षेत्रीय कार्यालयाच्या भोसरी व मोशी परिसरात 7 हजार 965 चौरस फूट क्षेत्रावर कारवाई करण्यात आली. फ क्षेत्रीय कार्यालयाच्या मोरे वस्ती, चिखली, तळवडे व नेवाळे वस्ती परिसरात सर्वाधिक 19 हजार 400 चौरस फूट क्षेत्रावरील अनधिकृत बांधकामे व अतिक्रमणे काढण्यात आले.
ग क्षेत्रीय कार्यालयाच्या राजवाडे नगर, गोकुळवाडी, पवनानगर, स्वप्ननगरी कॉलनी, काळेवाडी, डोंगरे कॉर्नर, मंगल नगर व थेरगाव परिसरात 13 हजार 35 चौरस फूट क्षेत्रावर कारवाई करण्यात आली. ह क्षेत्रीय कार्यालयाच्या सांगवी परिसरात 1 हजार 86 चौरस फूट, ज क्षेत्रीय कार्यालयाच्या वाल्हेकरवाडी, वाकडमधील दत्त मंदिर रस्ता, पिंपळे निलख व किवळे परिसरात 6 हजार 28 चौरस फूट आणि ल क्षेत्रीय कार्यालयाच्या भोसरी, इंद्रायणी नगर, संत तुकाराम नगर व पिंपरी परिसरात 3 हजार 426 चौरस फूट क्षेत्रावर कारवाई करण्यात आली.
शहरात कारवाई नियमितपणे सुरू राहणार
पिंपरी-चिंचवड शहरातील सार्वजनिक जागा, रस्ते व पदपथ अतिक्रमणमुक्त ठेवणे. अनधिकृत बांधकामांना प्रतिबंध करणे ही महापालिका प्रशासनाची जबाबदारी आहे. नागरिकांनी अनधिकृत बांधकामे किंवा अतिक्रमणे करू नयेत. नियमांचे उल्लंघन झाल्यास संबंधितांवर नियमानुसार कठोर कारवाई करण्यात येईल. शहराचे नियोजनबद्ध व शिस्तबद्ध स्वरूप कायम ठेवण्यासाठी यापुढेही क्षेत्रीय कार्यालयानुसार नियमित कारवाई सुरू राहणार आहे, असे आयुक्त डॉ. विजय सूर्यवंशी यांनी सांगितले.
