पिंपरी: शेअर मार्केटमध्ये गुंतवणूक केल्यास दरमहा पाच टक्के परतावा देण्याचे आमिष दाखवत गुंतवणूकदारांची एक कोटी 22 लाख 75 हजार 900 रुपयांची फसवणूक करण्यात आली. हा प्रकार 3 एप्रिल 2024 ते 15 मे 2026 या कालावधीत एनबीएम ट्रेडर्स, किवळे येथे घडला.
या प्रकरणी नितीन भास्कर माने (रा. मंगलविश्व सोसायटी, किवळे) याच्याविरुद्ध देहूरोड पोलिस ठाण्यात गुन्हा दाखल करण्यात आला आहे. आरोपी सध्या फरार असून, रावेत येथील एका पुरुषाने फिर्याद दिली आहे.
पोलिसांनी दिलेल्या माहितीनुसार आरोपी नितीन माने याने फिर्यादीसह अनेक गुंतवणूकदारांचा विश्वास संपादन केला होता. शेअर मार्केटमधून मोठा नफा मिळवून देण्याचे आश्वासन देत त्यांच्याकडून मोठ्या प्रमाणात पैसे घेतले होते.
फिर्यादीकडून 15 लाख रुपये घेतल्यानंतर त्यापैकी केवळ 9 लाख रुपये परत करण्यात आले. उर्वरित 5 लाख 91 हजार रुपये तसेच इतर 11 गुंतवणूकदारांचे 1 कोटी 16 लाख 84 हजार रुपये आरोपीने परत केले नाहीत.
पैशांची मागणी सुरू होताच आरोपीने मोबाइल बंद करून संपर्क तोडला. फसवणूक झाल्याचे लक्षात आल्यानंतर गुंतवणूकदारांनी पोलिसांकडे धाव घेतली. पोलिसांनी आर्थिक फसवणुकीचा गुन्हा दाखल करून आरोपीचा शोध सुरू केला आहे. तपास पोलिस उपनिरीक्षक वाघमारे करीत आहेत.
