देहूगाव: देहूरोड पोलिसांनी गस्तीदरम्यान मोटारसायकल चोरी करणाऱ्या टोळीचा पर्दाफाश करत तिघांना अटक केली आहे. त्यांच्याकडून चार मोटारसायकलसह एक ऑटोरिक्षा असा सुमारे पाच लाख रुपये किमतीचा मुद्देमाल जप्त करण्यात आला आहे.
देहूरोड पोलिस पथक परंडवाल चौक परिसरात गस्तीवर असताना पेट्रोल पंपाजवळ नंबर प्लेट नसलेली मोटारसायकल घेऊन फिरणारा एक संशयित युवक आढळून आला. पोलिसांनी त्याला ताब्यात घेऊन चौकशी केली असता, सदर मोटारसायकल चोरीची असल्याची कबुली त्याने दिली. ईश्वर संदीप गजे (वय 22, रा. खालुंबे, ता. खेड, मूळ रा. अकोला, शिवाजीनगर एस.टी. स्टँड मागे, जि. अहिल्यानगर) असे अटक करण्यात आलेल्या आरोपीचे नाव आहे.
अधिक तपासात ईश्वर गजे याने अनिकेत ऊर्फ छोट्या संतोष विटकर (वय 20, रा. विठ्ठलवाडी, पाण्याच्या टाकीजवळ, देहूगाव) व आर्यन ऊर्फ एस. पी. आनंदा राऊत (वय 19, रा. मोशी, भारतमाता चौक, गायकवाड वस्ती) हे दोघेही मोटारसायकल चोरीच्या गुन्ह्यांत सहभागी असल्याची माहिती दिली. त्यानुसार, देहूरोड पोलिसांनी या दोघांनाही ताब्यात घेऊन त्यांच्या ताब्यातून चार मोटारसायकली व एक ऑटोरिक्षा असा सुमारे पाच लाख रुपये किमतीचा मुद्देमाल हस्तगत केला आहे.
आरोपी अनिकेत विटकर याच्याविरुद्ध यापूर्वीचेही तीन गुन्हे दाखल असून, आरोपी आर्यन राऊत याच्याविरुद्ध मोटारसायकल चोरी व आर्म ॲक्ट 4 (25) अंतर्गत गुन्हे नोंद आहेत. ही संपूर्ण कारवाई पोलिस उपायुक्त श्वेता खेडकर यांच्या मार्गदर्शनाखाली करण्यात आली.
या कामगिरीत पोलिस निरीक्षक लखनकुमार वाव्हळे, पोलिस उपनिरीक्षक प्रल्हाद डोंगळे तसेच पोलिस अंमलदार किरण खेडकर, बाळासाहेब विधाते, सुरेश ढवळे, प्रशांत माळी, केतन कानगुडे, संतोष महाडिक, शुभम बावनकर, अमोल माने व मोमीन शेख यांनी सहभाग घेतला असल्याची माहिती देहूरोड पोलिस ठाण्याचे वरिष्ठ पोलिस निरीक्षक विक्रम बनसोडे यांनी दिली.
