पुणे: वैष्णवी हगवणे आत्महत्या प्रकरणात तिचा पती, सासरा, सासू, दीर, नणंदेसह एकूण अकरा आरोपींविरोधात सोमवारी प्रथमवर्ग न्यायदंडाधिकारी अलिशा बागल यांच्या न्यायालयात 1670 पानी आरोपपत्र दाखल करण्यात आले. त्यामध्ये, 11 आरोपींविरोधात ठोस पुरावे संकलित करण्यात आल्याचा दावा बावधन पोलिसांनी केला आहे.
दरम्यान, या प्रकरणात सरकार पक्षाची बाजू मांडण्यासाठी विशेष सरकारी वकील उज्वला पवार यांची नियुक्ती करण्यात आली आहे. वैष्णवीच्या आत्महत्येनंतर 58 दिवसांत हे आरोपपत्र दाखल करण्यात आले आहे. (Latest Pimpri News)
वैष्णवीला मारहाण व जाच करत आत्महत्येस प्रवृत्त केल्याप्रकरणी तिचा पती शशांक राजेंद्र हगवणे (वय 27), सासरा राजेंद्र तुकाराम हगवणे (वय 63), सासू लता राजेंद्र हगवणे (वय 54), नणंद करिश्मा राजेंद्र हगवणे (वय 31), दीर सुशील राजेंद्र हगवणे (वय 27, सर्व रा. मुक्ताई गार्डनजवळ, भुकूम), वैष्णवीच्या बाळाला बेकायदा ताब्यात ठेवले.
तिच्या नातेवाईकांना पिस्तूल दाखवून धमकावल्याप्रकरणी निलेश चव्हाण (वय 35, रा. कर्वेनगर) आणि आत्महत्येच्या घटनेनंतर पसार झालेल्या राजेंद्र व सुशील हगवणेला आश्रय दिल्याप्रकरणी प्रीतम वीरकुमार पाटील (वय 47, रा. कोनगोळी, ता. निपाणी, बेळगाव, कर्नाटक), मोहन उर्फ बंडू उत्तमराव भेगडे (वय 59, रा. भेगडेवस्ती, वडगाव मावळ), बंडू लक्ष्मण फाटक (वय 55, रा. भांगरवाडी, लोणावळा), अमोल विजय जाधव (वय 35) व राहुल दशरथ जाधव (वय 45, दोघे रा. पुसेगाव, ता. खटाव, सातारा) यांच्याविरोधात आरोपपत्र दाखल करण्यात आले आहे.
हुंडा व जमीन खरेदी करण्यासाठी सासरी होणार्या शारीरिक व मानसिक छळाला कंटाळून वैष्णवी शशांक हगवणे (वय 24, रा. मुक्ताई गार्डनजवळ, भुकूम, मुळशी) हिने 16 मे रोजी राहत्या घरात गळफास घेत आत्महत्या केली.
लता, करिश्मा, निलेशचा जामीनासाठी अर्ज
न्यायालयीन कोठडी सुनावल्याने येरवडा कारागृहात असलेल्या सहा आरोपींपैकी लता हगवणे, करिश्मा हगवणे आणि निलेश चव्हाण यांनी जामीन मिळण्यासाठी सत्र न्यायालयात अर्ज केला आहे. त्यापैकी निलेश चव्हाणच्या जामीन अर्जावर आज (मंगळवारी) सुनावणी होणार असून, लता व करिश्माच्या जामीन अर्जावर 25 जुलै रोजी सुनावणी होणार आहे. या जामीन अर्जांवरील सुनावणीची प्रक्रिया पूर्ण झाल्यानंतरच सर्व आरोपींविरोधात आरोप निश्चिती करून खटल्याच्या सुनावणीला सुरवात होणार आहे.
