गुजरात भाजपच्या चारच खासदारांना पुन्हा संधी!

गांधीनगर; वृत्तसंस्था :  लोकसभा निवडणुकीला वर्षावर कालावधी उरलेला असताना भाजपने 'मिशन २०२४ ' साठी आतापासून तयारी सुरू केली आहे. मे २०२४ च्या लोकसभा निवडणुकीत गुजरातमध्ये भाजप विद्यमान २६ खासदारांपैकी केवळ ४ खासदारांना पुन्हा उमेदवारी देणार आहे.

अमित शहा (गांधीनगर), सी. आर. पाटील (नवसारी), विनोद चावडा (कच्छ), भारतीबेन शियाल (भावनगर) यांना रिपीट केले जाईल. उर्वरित २२ जागी पक्षाने नवे उमेदवार • देण्याची तयारी चालवली आहे. पंतप्रधान नरेंद्र मोदी गुरुवारी गुजरातेत असताना 'राजभवनातील बैठकीत लोकसभा निवडणुकीसाठीची ब्ल्यू प्रिंट तयार करण्यात आली. विधानसभा निवडणुकीतील यशाचा फॉर्म्युलाच लोकसभेसाठीही वापरला जाणार आहे.