viral reddit job story
मुंबई: कॉर्पोरेट विश्वातील नोकरभरतीचे नियम आणि अटी नेहमीच चर्चेत असतात, पण सध्या सोशल मीडियावर नोकरी नाकारल्याची एक अजब पोस्ट व्हायरल होत आहे. आधीचे ऑफिस नव्या कंपनीपासून अवघ्या ६०० मीटर अंतरावर असल्याच्या कारणावरून एका कंपनीने तरूणाला नोकरी देण्यास नकार दिला. डेटा सुरक्षा आणि गोपनीयतेचे कारण देत कंपनीने हा निर्णय घेतला असून, या अजब धोरणावर आता नेटकर्यांनी आश्चर्य व्यक्त केले आहे.
संबंधित तरूणाने Reddit या सोशल मीडिया प्लॅटफॉर्मवर आपल्यासोबत घडलेला हा प्रकार शेअर केला आहे. सुरुवातीला या उमेदवाराची प्रोफाईल आणि कामाचा अनुभव कंपनीला खूप आवडला होता. निवड प्रक्रियेचे पहिले काही टप्पेही सुरळीत पार पडले. मात्र, त्यानंतर कंपनीकडून एक ई-मेल आला. कंपनीने आपल्या अंतर्गत धोरणांचा संदर्भ देत, आधीचे ऑफिस जवळ असल्याने डेटा सुरक्षेचा धोका निर्माण होऊ शकतो, असे सांगत हा अर्ज फेटाळला.
उमेदवाराने ई-मेलचा स्क्रीनशॉट शेअर केला आहे. त्यामध्ये म्हटले आहे की, "तुमची प्रोफाईल आणि अनुभव आम्हाला आवडला. परंतु, गोपनीयता आणि डेटा सुरक्षेशी संबंधित आमच्या अंतर्गत व्यवस्थापन धोरणांमुळे, आम्ही तुमच्या अर्जावर पुढे प्रक्रिया करू शकत नाही. कारण, तुमची आधीची कंपनी आमच्या ऑफिसपासून अवघ्या ६०० मीटर अंतरावर आहे. हा निर्णय पूर्णपणे कंपनीच्या धोरणावर आधारित असून, याचा तुमच्या क्षमतेशी किंवा व्यावसायिकतेशी काहीही संबंध नाही."
यावर प्रतिक्रिया देताना तरूणाने म्हटले आहे की, "माझ्या आयुष्यातील हे सगळ्यात विनोदी रिजेक्शन लेटर आहे. त्यांनी चक्क दोन्ही ऑफिसमधील अंतर मोजले!" मात्र, तरीही इतर उमेदवाराची निवड झाली असे खोटे कारण न सांगता कंपनीने स्पष्टपणे खरे कारण सांगितल्याबद्दल त्याने समाधानही व्यक्त केले आहे. उमेदवाराने कंपनीचे नाव मात्र जाहीर केलेले नाही.
