Umar Khalid interim bail rejected
नवी दिल्ली : दिल्लीच्या कडकडडुमा कोर्टाने जेएनयूचा (JNU) माजी विद्यार्थी आणि दिल्ली दंगलीतील आरोपी उमर खालिदची अंतरिम जामीन याचिका फेटाळली आहे. आपल्या काकांच्या निधनानंतरचा ४० वा दिवस) कार्यक्रमात सहभागी होण्यासाठी त्याने ही याचिका दाखल केली होती.
खालिदने आपल्या आजारी आईच्या शस्त्रक्रियेदरम्यान तिची देखभाल करण्यासाठी, तसेच गेल्या महिन्यात निधन झालेल्या आपल्या काकाच्या 'चेहल्लुम' विधीमध्ये सहभागी होण्यासाठी १५ दिवसांच्या अंतरिम जामिनाची मागणी केली होती. दिल्ली पोलिसांनी या अंतरिम जामिनाला विरोध केला होता. त्यांनी असे नमूद केले की, खालिदच्या आईची शस्त्रक्रिया ही काही तातडीची बाब नाही आणि त्याचे काका हे त्याचे दूरचे नातेवाईक आहेत. तसेच, अंतरिम जामीन मंजूर करणे आवश्यक ठरतील अशा कोणत्याही असाधारण किंवा विशेष परिस्थिती अस्तित्वात नसल्याचेही त्यांनी स्पष्ट केले.
या प्रकरणाचा विचार केल्यानंतर, कडकडडूमा न्यायालयाचे अतिरिक्त सत्र न्यायाधीश (ASJ) समीर वाजपेयी यांनी दिल्ली पोलिसांच्या या युक्तिवादाशी सहमती दर्शवली की, खालिदचे दिवंगत काका हे त्याचे जवळचे नातेवाईक नाहीत.न्यायालयाने असेही नमूद केले की, खालिदच्या आईच्या शस्त्रक्रियेपूर्वी आणि नंतर, तिच्या देखभालीची जबाबदारी खालिदच्या बहिणी आणि वडील पार पाडू शकतात. जामिनासाठीच्या अर्जात देण्यात आलेली कारणे योग्य आढळलेली नाहीत, त्यामुळे अर्जदाराला दिलासा देणे योग्य ठरणार नाही; परिणामी हा अर्ज फेटाळण्यात येत आहे.
खालिदला सप्टेंबर २०२० मध्ये अटक करण्यात आली होती. त्याच्यावर गुन्हेगारी कट रचणे, दंगल घडवणे, बेकायदेशीर जमाव जमवणे, तसेच 'बेकायदेशीर कृत्ये प्रतिबंधक कायद्या' (UAPA) अंतर्गत इतर अनेक गुन्ह्यांसाठी खटला चालवला जात आहे.
