Mumbai Terror Suspects Arrest: मुंबईतून दोन संशयित दहशतवाद्यांना अटक केल्याच्या घटनेने देशभरात खळबळ उडाली आहे. दिल्ली पोलिसांच्या स्पेशल सेलने महाराष्ट्र अँटी टेररिझम स्क्वॉड (ATS)च्या मदतीने ही कारवाई करत संभाव्य मोठा दहशतवादी हल्ला टाळला आहे. प्राथमिक माहितीनुसार, हे दोघे दिल्लीमध्ये खेळण्याच्या कारमध्ये बॉम्ब लपवून हल्ला करण्याच्या तयारीत होते.
अटक करण्यात आलेल्या आरोपींची ओळख मोस्साब अहदम उर्फ कलाम कल्याण आणि मोहम्मद हमाद कोल्लारा अशी असून दोघेही मुंबईचे रहिवासी आहेत. अटकेनंतर त्यांना पुढील चौकशीसाठी दिल्लीला नेण्यात आले आहे. तपास यंत्रणांच्या मते, हे दोघे अत्यंत कट्टरपंथी विचारसरणीने प्रभावित झाले होते आणि त्यांचे संबंध जैश-ए-मोहम्मद (JeM) तसेच इस्लामिक स्टेट (ISIS) सारख्या दहशतवादी संघटनांशी असल्याची शक्यता व्यक्त करण्यात येत आहे.
तपासात असेही समोर आले आहे की, आरोपी ऑनलाइन प्लॅटफॉर्मच्या माध्यमातून कट्टरतावादी जाळ्यात अडकले होते. “मिशन खिलाफत” आणि “सोल्जर्स ऑफ प्रॉफेट” यांसारख्या नेटवर्कशी त्यांचा संपर्क होता. विशेष म्हणजे, अबू हुफेजाह नावाच्या एका संशयित व्यक्तीशी ते संपर्कात होते, हा व्यक्ती जैश-ए-मोहम्मदशी संबंधित असून ऑनलाइन भरतीमध्ये सक्रिय असल्याचे सांगितले जाते.
या दोघांना इम्प्रोव्हाइज्ड एक्सप्लोसिव्ह डिव्हाइस (IED) तयार करण्याचे प्रशिक्षण दिले जात होते, अशीही माहिती तपासातून समोर आली आहे. खेळण्याच्या कारमध्ये बॉम्ब लपवून दिल्लीत हल्ला करण्याचा त्यांचा कट असल्याचेही उघड झाले आहे. या पार्श्वभूमीवर सुरक्षा यंत्रणा अधिक सतर्क झाल्या आहेत.
दरम्यान, या प्रकरणाचे धागेदोरे देशभर पसरलेल्या मोठ्या नेटवर्कशी जोडलेले असण्याची शक्यता तपासली जात आहे. मुंबईतील काही अल्पवयीन मुलांवरही संशय व्यक्त करण्यात आला असून ते ISIS च्या प्रचारामुळे प्रभावित झाल्याची शक्यता आहे. यासंदर्भात दिल्ली पोलिसांची स्पेशल सेल अधिक तपास करत आहे.
सध्या अटक करण्यात आलेल्या आरोपींची सखोल चौकशी सुरू असून त्यांच्या नेटवर्कचा विस्तार, निधीचा स्रोत आणि संभाव्य लक्ष्य याबाबत माहिती गोळा केली जात आहे. या कारवाईमुळे एक मोठा दहशतवादी कट उधळण्यात यश आल्याचे मानले जात आहे, मात्र यामागील संपूर्ण जाळे उघड करणे हे आता तपास यंत्रणांसमोरचे मोठे आव्हान आहे.
