Sonam Wangchuk Hunger Strike: प्रख्यात शिक्षणतज्ज्ञ आणि सामाजिक कार्यकर्ते सोनम वांगचुक यांनी तब्बल 26 दिवसांनंतर उपोषण मागे घेतले आहे. उपोषण संपवल्यानंतर त्यांनी सोशल मीडियावर एक व्हिडिओ शेअर करत हा निर्णय कोणत्या आश्वासनांनंतर घेतला, याची सविस्तर माहिती दिली. "26 दिवसांनंतर अन्नाची चव किती छान लागते, हे शब्दांत सांगता येणार नाही," असं म्हणत त्यांनी उपोषण संपल्याची माहिती दिली.
सोनम वांगचुक यांनी सांगितले की, केंद्रीय मंत्री जेपी नड्डा आणि डॉ. जितेंद्र सिंह यांनी त्यांची भेट घेतली. याशिवाय विविध पक्षांतील सुमारे 65 खासदारांनी त्यांची भेट घेऊन लेखी स्वरूपात काही मुद्दे संसदेत मांडण्याचे आश्वासन दिले. या खासदारांनी NEET पेपर लीक प्रकरण, शिक्षण व्यवस्थेतील सुधारणा आणि विद्यार्थ्यांशी संबंधित इतर प्रश्न संसदेत उपस्थित करून त्यावर गंभीर चर्चा केली जाईल, असे सांगितल्याचे वांगचुक यांनी नमूद केले.
वांगचुक यांच्या म्हणण्यानुसार, केंद्र सरकारच्या मंत्र्यांनी 20 मार्च रोजी झालेल्या 'संसद चलो' मोर्चात शांततेत सहभागी झालेल्या आंदोलनकर्त्यांवर कोणतीही कायदेशीर कारवाई केली जाणार नाही, असे आश्वासन दिले आहे. तसेच शांततापूर्ण आंदोलन करणाऱ्या विद्यार्थी आणि युवकांविरोधात कोणतेही गुन्हे दाखल केले जाणार नसल्याचेही सांगण्यात आल्याचा दावा त्यांनी केला.
व्हिडिओमध्ये सोनम वांगचुक यांनी असेही म्हटले की, NEET पेपर लीक प्रकरणामुळे आत्महत्या केलेल्या विद्यार्थ्यांच्या कुटुंबांना योग्य भरपाई देण्याबाबत सरकारने सकारात्मक भूमिका दर्शवली आहे. तसेच शिक्षण व्यवस्थेतील सुधारणा करण्यासाठी सरकार गंभीर असल्याचा विश्वासही मंत्र्यांनी व्यक्त केल्याचे सांगितले.
उपोषण संपले असले तरी आंदोलन संपलेले नाही, असे स्पष्ट करत वांगचुक म्हणाले की, आता सरकारने दिलेली आश्वासने प्रत्यक्षात कितपत पूर्ण होतात, यावर लक्ष ठेवले जाईल. विद्यार्थ्यांचे प्रश्न आणि शिक्षण व्यवस्थेतील सुधारणा यासाठी पुढेही पाठपुरावा सुरू राहील, असे त्यांनी स्पष्ट केले.
दरम्यान, उपोषणादरम्यान प्रकृती खालावल्यानंतर सोनम वांगचुक यांना प्रथम दिल्लीतील सफदरजंग रुग्णालयात दाखल करण्यात आले होते. त्यानंतर त्यांच्या पत्नी डॉ. गीतांजली आंग्मो यांनी त्यांना अधिक चांगल्या उपचारासाठी मेदांता रुग्णालयात हलवण्याची मागणी दिल्ली उच्च न्यायालयात केली होती.
या प्रकरणाची सुनावणी करताना दिल्ली उच्च न्यायालयाने सोनम वांगचुक यांना मेदांता रुग्णालयात हलवण्याचे आदेश दिले होते. त्यांच्या प्रकृतीचा विचार करता तज्ज्ञ डॉक्टरांची आवश्यकता असल्याचे न्यायालयाने नमूद केले होते.
