Nuwan Thushara IPL 2026
रॉयल चॅलेंजर्स बेंगळुरू (RCB) चा श्रीलंकन वेगवान गोलंदाज नुवान थुषारा याने 'IPL 2026' मध्ये सहभागी होण्यासाठी 'ना हरकत प्रमाणपत्र' (NOC) न मिळाल्यामुळे श्रीलंका क्रिकेट (SLC) च्या उच्च पदस्थ अधिकाऱ्यांविरुद्ध न्यायालयात धाव घेतली आहे.
नेमका वाद काय ?
श्रीलंकेमधील 'न्यूजवायर' (NewsWire)ने दिलेल्या वृत्तानुसार, थुषाराने म्हटलं आहे की, श्रीलंका क्रिकेटसोबतचा त्याचा करार ३१ मार्च रोजी संपला होता. तसेच, आपण करार नूतनीकरण न करण्याच्या आणि आंतरराष्ट्रीय क्रिकेटमधून निवृत्त होण्याच्या निर्णयाबद्दल बोर्डाला आधीच सूचित केले होते. तुषाराने दावा केला आहे की, सध्याची त्याची फिटनेस पातळी त्याच्या संपूर्ण कारकीर्दीत जशी होती तशीच आहे. यापूर्वी कधीही एनओसी मिळवण्यात अडचण आली नव्हती. या परिस्थितीमुळे एनओसी नाकारण्याचा निर्णय अन्यायकारक असल्याचे सांगत, त्याने न्यायालयाचा दरवाजा ठोठावला आहे.
श्रीलंका क्रिकेट बोर्डने विहित शारीरिक फिटनेस मानदंडांची पूर्तता न केल्यामुळे थुषाराला एनओसी नाकारण्यात आली होती. मात्र, आता या गोलंदाजाने आपल्याला आयपीएल खेळण्याची परवानगी मिळावी, यासाठी न्यायालयाचे आदेश मिळवण्याकरिता याचिका दाखल केली आहे. तुषाराने आपला मध्यवर्ती करार नूतनीकरण न करण्याच्या निर्णयाबद्दलही श्रीलंका क्रिकेट बोर्डाला कळवले आहे.
थुशाराने आपल्या तक्रार अर्जात श्रीलंका क्रिकेटचे अध्यक्ष शम्मी सिल्वा, सचिव बंदुला दिसानायके, कोषाध्यक्ष सुजीवा गोदालियाड्डा आणि मुख्य कार्यकारी अधिकारी (CEO) ॲशले डी सिल्वा यांना प्रतिवादी म्हणून नमूद केले आहे.या प्रकरणावर ९ एप्रिल रोजी सुनावणी निश्चित करण्यात आली असून, कोलंबो जिल्हा न्यायालय गुरुवारी यावर सुनावणी घेणार आहे.
२०२५ च्या हंगामात RCB ने या श्रीलंकन गोलंदाजाला १.६ कोटी रुपयांना संघात समाविष्ट केले होते. त्या हंगामात त्याने एक सामना खेळला होता. RCB संघाने IPL २०२५ चे विजेतेपद पटकावले होते. NOC मिळवण्यात अपयश आल्यास आपले मोठे आर्थिक नुकसान होईल, तसेच संधीही गमावावी लागेल, अशी माहिती त्याने न्यायालयाला दिल्याचे समजते.
