PM Modi Mimicry Controversy: इंदूरमध्ये राहुल गांधींच्या ‘छात्रों की गूंज’ कार्यक्रमात पंतप्रधान नरेंद्र मोदी यांच्या बोलण्याच्या शैलीची आणि हावभावांची मिमिक्री करण्यात आल्याने राजकीय वाद निर्माण झाला आहे. स्टँड-अप कॉमेडियन पुलकित मणी यांनी पीएम मोदींच्या एका भाषणातील ‘मां को कुर्सी दो’ या प्रसंगाची मिमिक्री केली. यावेळी राहुल गांधी मंचावर उपस्थित होते आणि ते हसताना दिसले. या घटनेवर भाजप नेत्यांनी राहुल गांधी आणि काँग्रेसवर टीका केली आहे.
अभिनेता रणवीर शौरी यांनीही या प्रकरणावर सोशल मीडियाच्या माध्यमातून प्रतिक्रिया दिली. त्यांनी राहुल गांधी आणि काँग्रेसवर निशाणा साधत म्हटले, “‘मां को कुर्सी दो’ची खिल्ली उडवत आहेत, ज्यांच्या संपूर्ण पक्षाचे अस्तित्व मुलाला खुर्ची मिळवून देण्यावर आहे.” त्यांच्या या वक्तव्याची सोशल मीडियावर चर्चा होत आहे.
19 सप्टेंबर रोजी इंदूरमध्ये राहुल गांधी यांच्या उपस्थितीत ‘छात्रों की गूंज’ हा कार्यक्रम आयोजित करण्यात आला होता. या कार्यक्रमात स्टँड-अप कॉमेडियन पुलकित मणी यांनी पंतप्रधान नरेंद्र मोदी यांच्या भाषणशैलीची मिमिक्री केली. यामध्ये पीएम मोदी यांनी गर्दीत उभ्या असलेल्या एका वृद्ध महिलेला बसण्यासाठी खुर्ची दिली होती, त्या प्रसंगाची ‘छात्रों की गूंज’ कार्यक्रमात मिमिक्री करण्यात आली.
पीएम मोदी यांनी त्या वेळी “मां को कुर्सी दो” असे म्हटल्याचा संदर्भ देत पुलकित मणी यांनी त्याची विनोदी शैलीत मिमिक्री केली. या प्रसंगादरम्यान राहुल गांधी हसताना दिसले. कार्यक्रमातील हा व्हिडिओ सोशल मीडियावर व्हायरल झाल्यानंतर राहुल गांधी यांच्यावर टीका सुरू झाली.
या घटनेवर भाजप नेत्यांनी तीव्र प्रतिक्रिया दिली. उत्तराखंडचे मुख्यमंत्री पुष्कर सिंह धामी तसेच केंद्रीय शिक्षणमंत्री प्रल्हाद जोशी यांच्यासह भाजपच्या अनेक नेत्यांनी राहुल गांधी आणि काँग्रेसवर टीका केली.
प्रल्हाद जोशी यांनी सोशल मीडिया पोस्टमध्ये या घटनेला “लज्जास्पद आणि किळसवाणे” असे संबोधत राहुल गांधी आणि काँग्रेसवर निशाणा साधला. पंतप्रधान नरेंद्र मोदी यांच्या दिवंगत आईचा अपमान करण्यासाठी विद्यार्थ्यांसोबतच्या कार्यक्रमाचा वापर केल्याचा आरोपही त्यांनी केला.
दरम्यान, या वादानंतर पुलकित मणी यांच्या काही स्टँड-अप कॉमेडी कार्यक्रमांवरही परिणाम झाल्याचे वृत्त आहे.
या प्रकरणावर गायिका नेहा सिंह राठौर यांनीही सोशल मीडिया पोस्टद्वारे प्रतिक्रिया दिली. त्यांनी पंतप्रधान मोदींवर यापूर्वी करण्यात आलेल्या राजकीय टीकेचा संदर्भ देत भाजपच्या भूमिकेवर प्रश्न उपस्थित केला.
नेहा सिंह राठौर यांनी प्रश्न उपस्थित केला की, पंतप्रधानांची मिमिक्री केली असेल तर त्याचा त्यांच्या आईचा अपमान कसा ठरतो? यासोबतच त्यांनी राजकीय नेत्यांकडून यापूर्वी करण्यात आलेल्या वैयक्तिक आणि कौटुंबिक उल्लेखांचाही संदर्भ दिला.
दरम्यान, काँग्रेस नेते राशिद अल्वी यांनी राहुल गांधींचा बचाव केला आहे. इंदूरच्या कार्यक्रमात पंतप्रधान नरेंद्र मोदी यांची करण्यात आलेली नक्कल ही केवळ मिमिक्री होती आणि तिच्यामागे कोणाचाही अपमान करण्याचा हेतू नव्हता, असे त्यांनी म्हटले.
अल्वी यांनी सांगितले की, त्यांनी कार्यक्रमाचा व्हिडिओ पाहिला असून त्यांना त्यात आक्षेपार्ह असे काही वाटले नाही. एखाद्या नेत्याची मिमिक्री करणे म्हणजे त्याचा अपमान करणे असे नाही, असेही त्यांनी स्पष्ट केले. राहुल गांधी केवळ मिमिक्री पाहून हसले होते आणि कार्यक्रमातील इतर लोकही हसत होते, असे त्यांनी म्हटले.
या संपूर्ण प्रकरणामुळे आता मिमिक्री, राजकीय व्यंग आणि नेत्यांच्या सार्वजनिक कार्यक्रमांमधील विनोद यावरून नवा राजकीय वाद निर्माण झाला आहे.
