मुंबई: भारतीय जाहिरात विश्वातील (Indian Advertising Industry) सर्वोच्च नाव, सुप्रसिद्ध ‘ॲड गुरु’ पियुष पांडे यांचे आज शुक्रवार (दि.24) निधन झाले. ते 70 वर्षांचे होते. त्यांच्या निधनाने भारतीय जाहिरात क्षेत्रावर शोककळा पसरली असून, एका युगाचा अंत झाल्याची भावना व्यक्त होत आहे. जाहिरात क्षेत्रातील त्यांचे योगदान अमूल्य आणि अतुलनीय मानले जाते.
पियुष पांडे यांनी आपल्या चार दशकांच्या देदीप्यमान कारकिर्दीत अनेक ब्रँड्सला एक नवी ओळख मिळवून दिली. त्यांनी ओगिल्वी इंडिया (Ogilvy India) या जाहिरात कंपनीत मोठे काम केले. त्यांच्या अत्यंत गाजलेल्या आणि लोकप्रिय ठरलेल्या जाहिरात मोहिमांमध्ये (Ad Campaigns) यांचा समावेश आहे:
कॅडबरी (Cadbury): त्यांनी दिलेली "कुछ खास है..." ही ओळ केवळ जाहिरात न राहता, अनेक भारतीयांच्या भावनांशी जोडली गेली आणि जगभर लोकप्रिय झाली.
एशियन पेंट्स (Asian Paints): "हर खुशी में रंग लाए"
फेविकॉल (Fevicol): फेविकॉलच्या कल्पक आणि हास्यगर्भ जाहिरातींमागे त्यांचीच सर्जनशीलता होती.
व्यावसायिक जाहिरातींप्रमाणेच, २०१४ च्या लोकसभा निवडणुकीत भाजपसाठी अत्यंत महत्त्वपूर्ण ठरलेली "अबकी बार मोदी सरकार" ही स्लोगन (घोषणा) देखील त्यांनीच तयार केली होती.
जाहिरात क्षेत्रात लोकांच्या अगदी साध्या आणि हृदयस्पर्शी भावनांना आपल्या शब्दांतून आणि कल्पनांतून मांडण्याचे कसब त्यांच्यात होते. त्यांच्या या योगदानामुळे त्यांना अनेक राष्ट्रीय आणि आंतरराष्ट्रीय पुरस्कारांनी सन्मानित करण्यात आले होते. पियुष पांडे यांच्या निधनामुळे भारतीय जाहिरात विश्वात एक मोठी पोकळी निर्माण झाली असून, संपूर्ण क्रिएटिव्ह जगताने त्यांना श्रद्धांजली वाहिली आहे. त्यांच्या कार्यामुळे ते जाहिरात क्षेत्रातील भावी पिढ्यांसाठी नेहमीच प्रेरणास्रोत राहतील.
