Padma Shri Awardee Monk Kartik Maharaj West Bengal Bharat Sevashram Sangha Job Pretext Sexual Assault
कोलकाता: पश्चिम बंगालमधून एक अत्यंत धक्कादायक घटना समोर आली आहे. येथील एका महिलेने भारत सेवाश्रम संघाचे साधू आणि पद्मश्री पुरस्कार विजेते कार्तिक महाराज यांच्यावर तब्बल 12 वेळा बलात्कार केल्याचा गंभीर आरोप केला आहे.
नोकरीचे आमिष दाखवून आश्रमात बोलावून हे घृणास्पद कृत्य केल्याचे महिलेने आपल्या तक्रारीत म्हटले आहे. या प्रकरणामुळे राज्यात मोठी खळबळ उडाली आहे.
पीडित महिलेने दिलेल्या तक्रारीनुसार, ही घटना २०१३ सालची आहे. कार्तिक महाराज यांनी तिला मुर्शिदाबाद येथील एका आश्रमाच्या शाळेत शिक्षिकेची नोकरी देण्याचे आश्वासन दिले होते. त्यासाठी तिला आश्रमात राहण्याची सोयही करून देण्यात आली.
मात्र, एके रात्री महाराज तिच्या खोलीत घुसले आणि तिच्यावर लैंगिक अत्याचार केले, असा दावा महिलेने केला आहे. जानेवारी ते जून २०१३ या सहा महिन्यांच्या कालावधीत महाराजांनी तिच्यावर किमान १२ वेळा बलात्कार केल्याचे तिने म्हटले आहे.
धमकीमुळे राहिली गप्प
इतकी वर्षे गप्प का बसली, असे विचारले असता, भीती आणि असहाय्यतेमुळे आपण गप्प राहिल्याचे महिलेने सांगितले. जर पोलिसांकडे तक्रार केली तर आत्महत्या करण्याची धमकी महाराजांनी दिली होती, असेही पीडितेने म्हटले आहे.
पोलिसांनी याप्रकरणी तक्रार दाखल झाल्याची पुष्टी केली असून, कार्तिक महाराज यांच्यावर संबंधित कलमांखाली गुन्हा नोंदवून तपास सुरू केला आहे.
कार्तिक महाराजांनी आरोप फेटाळले
दुसरीकडे, यावर्षी देशाचा चौथा सर्वोच्च नागरी सन्मान ‘पद्मश्री’ मिळालेल्या कार्तिक महाराज यांनी आपल्यावरील सर्व आरोप फेटाळून लावले आहेत. "मी एक संन्यासी आहे. संन्याशाच्या आयुष्यात असे अडथळे येणे सामान्य आहे," असे ते म्हणाले.
महिलेने उल्लेख केलेल्या आश्रमात राहण्याची सोय असल्याची तरतूद असल्याचेही त्यांनी सांगितले. आपली कायदेशीर टीम या प्रकरणाला न्यायालयात उत्तर देईल, असेही त्यांनी स्पष्ट केले.
हे प्रकरण अशा वेळी समोर आले आहे जेव्हा कार्तिक महाराज आणि सत्ताधारी तृणमूल काँग्रेस यांच्यात आधीच तणाव आहे. महाराज भाजपच्या जवळचे मानले जातात.
पश्चिम बंगालच्या मुख्यमंत्री ममता बॅनर्जी यांनी यापूर्वी महाराजांवर निवडणुकीत भाजपला मदत केल्याचा आणि तृणमूल काँग्रेसविरोधात काम केल्याचा आरोप केला होता.
यानंतर महाराजांनी ममता बॅनर्जी यांना आश्रमाची प्रतिमा मलिन केल्याबद्दल बिनशर्त माफी मागण्यासाठी कायदेशीर नोटीस देखील पाठवली होती.
या घटनेमुळे पश्चिम बंगालमधील राजकीय आणि सामाजिक वातावरण तापले आहे. पोलीस तपासानंतर या प्रकरणातील सत्य समोर येईल, ज्याकडे सर्वांचे लक्ष लागले आहे.
