पुढारी ऑनलाईन डेस्क: अठराव्या लोकसभेच्या दुसऱ्या आठवड्यातील पहिल्या सत्राला आजपासून (दि.1 जुलै) सुरूवात झाली. यावेळी विरोधी पक्षनेते राहुल गांधी यांनी कथित NEET-UG पेपर लीकवर एकदिवसीय चर्चेची मागणी केली. विरोधकांच्या या मागणी लोकसभा अध्यक्ष ओम बिर्ला यांनी स्पष्ट नकार दिला. यानंतर विरोधकांनी सोमवारी (दि.१ जुलै)लोकसभेतून सभात्याग केला.
भाजप खासदार अनुराग ठाकूर आज (दि.१ जुलै) लोकसभेत राष्ट्रपतींच्या अभिभाषणावर आभार प्रस्ताव मांडला. दरम्यान विरोधी पक्षनेते राहुल गांधी पुन्हा एकदा 'NEET' पेपरफुटीचा चर्चेचा मुद्दा संसद सभागृहात उपस्थित केला. यावेळी राहुल गांधी म्हणाले, "आम्हाला NEET वर एक दिवसीय चर्चा हवी होती. हा एक महत्त्वाचा मुद्दा आहे. दोन कोटींहून अधिक विद्यार्थ्यांना याचा फटका बसला आहे. ७० वेळा पेपर लीक झाल्या आहेत. तुम्ही या विषयावर स्वतंत्र चर्चेला परवानगी दिल्यास आम्हाला आनंद होईल," असेही राहुल गांधी म्हणाले.
परंतु, अध्यक्ष ओम बिर्ला यांनी विरोधकांची विनंती स्पष्टपणे नाकारली. पुढे त्यांनी राष्ट्रपतींच्या अभिभाषणावर धन्यवाद प्रस्ताव मंजूर केल्यानंतर इतर मुद्दे उपस्थित केले जाऊ शकतात,असे सांगितले.
