NEET Paper Leak Update:
नवी दिल्ली : देशभरात खळबळ माजवणाऱ्या NEET (नीट) परीक्षा पेपर फुटी प्रकरणाचा तपास आता अधिक तीव्र झाला आहे. या प्रकरणातील महत्त्वाच्या आरोपी मनीषा हवालदार आणि मनीषा मांढरे यांना केंद्रीय अन्वेषण विभागाने (CBI) विशेष सीबीआय कोर्टासमोर हजर केले होते. दोन्ही बाजूंचा युक्तिवाद ऐकल्यानंतर न्यायालयाने मनीषा हवालदार यांना दोन दिवसांची सीबीआय कोठडी सुनावली आहे, तर दुसरी आरोपी मनीषा मांढरे यांना १४ दिवसांची न्यायालयीन कोठडी (Judicial Custody) सुनावण्यात आली आहे.
आर्थिक धागेदोरे तपासण्यासाठी कोठडीची मागणी
सुनावणीदरम्यान सीबीआयच्या वकिलांनी कोर्टात मनीषा हवालदार यांच्या कोठडीची मुदत वाढवून देण्याची जोरदार मागणी केली. "या संपूर्ण घोटाळ्याचा सखोल तपास करणे अत्यंत गरजेचे आहे. या गुन्ह्यामध्ये मोठे आर्थिक व्यवहार झाल्याचा संशय असून, त्याचे आर्थिक धागेदोरे (Financial Links) शोधणे आवश्यक आहे," असा युक्तिवाद सीबीआयने कोर्टात केला. सीबीआयचा हा दावा ग्राह्य धरत कोर्टाने हवालदार यांना दोन दिवसांची सीबीआय कोठडी मंजूर केली.
हस्ताक्षर आणि सहीचे नमुने घेणार
तपासाला गती देण्यासाठी आणि भक्कम पुरावे गोळा करण्यासाठी सीबीआयने कोर्टाकडे एक महत्त्वाची परवानगी मागितली आहे. मनीषा हवालदार यांचे हस्ताक्षर (Handwriting) आणि सहीचे (Signature) नमुने घेण्याची परवानगी सीबीआयने न्यायालयाकडे मागितली असून, या फॉरेन्सिक पुराव्यांद्वारे पेपर फुटीतील संशयास्पद कागदपत्रांची पडताळणी केली जाणार आहे.
दुसरीकडे, मनीषा मांढरे यांना १४ दिवसांची न्यायालयीन कोठडी मिळाल्यामुळे त्यांची रवानगी आता तुरुंगात होणार आहे. या पेपर फुटीच्या मागे आणखी कोणते मोठे मासे आहेत आणि याचे जाळे कुठपर्यंत पसरले आहे, याचा शोध आता सीबीआय पुढील दोन दिवसांच्या कोठडीत मनीषा हवालदार यांच्या चौकशीतून घेणार आहे.
