Kanpur Aircraft Crash : कानपूरमधील गंगा बॅरेजजवळ असलेल्या नत्थूपुरवा गावाजवळील एका शेतात आज (दि. २७ ऑगस्ट) दुपारी दुहेरी इंजिन असलेले प्रशिक्षणार्थी विमान कोसळून भीषण अपघात झाला. या दुर्घटनेत एका प्रशिक्षणार्थी पायलटसह इंस्ट्रक्टर (प्रशिक्षक) पायलटचा घटनास्थळीच मृत्यू झाला आहे, असे वृत्त 'पीटीआय'ने दिले आहे. घटनेची माहिती मिळताच आपत्कालीन यंत्रणांनी तात्काळ अपघातस्थळी धाव घेत मदतकार्य सुरू केले आहे.
प्राथमिक माहितीनुसार, हे विमान ‘गर्ग एव्हिएशन’चे ‘टेक्नम P2006T’ (Tecnam P2006T) मॉडेल असल्याचे समजते. गर्ग एव्हिएशनच्या कानपूर ताफ्यात या प्रकारचे एक विमान उपलब्ध आहे. तथापि, विमानाचा अधिकृत प्रकार आणि नोंदणी क्रमांकाबाबत नागरी विमान वाहतूक महासंचालनालयाकडून (DGCA) अद्याप अधिकृत पुष्टी व्हायची आहे.
विशेष म्हणजे, अवघ्या दोन महिन्यांपूर्वीच कानपूर येथील गर्ग एव्हिएशनच्या फ्लाइंग ट्रेनिंग ऑर्गनायझेशन (FTO) मध्ये असाच एक अपघात घडला होता. २६ जून रोजी रात्रीच्या सराव उड्डाणानंतर विमानातील पंखा (प्रोपेला) सुरू असताना बाहेर पडताना नवी दिल्लीतील एका महिला कॅडेट पायलटला त्याचा जोरदार फटका बसला होता. ‘VT-NBV’ नोंदणीकृत टेक्नम P2006T विमानाच्या या अपघातात महिला पायलटच्या पाठीच्या खालच्या भागाला गंभीर दुखापत झाली होती.
