IndiGo fee hike : इंडिगो एअरलाईन्सने (IndiGo Airlines) अनेक सेवांचे दर वाढवले आहेत; यामध्ये लहान मुलांचा प्रवास, एकट्याने प्रवास करणारी अल्पवयीन मुले (unaccompanied minors), प्राधान्य चेक-इन आणि बोर्डिंग, अतिरिक्त सामान आणि प्रवास प्रमाणपत्रे यांचा समावेश आहे.
सूत्रांनी दिलेल्या माहितीनुसार, दरांमधील हा बदल म्हणजे पूरक सेवांच्या शुल्काचा आढावा घेण्याच्या आणि त्या अद्ययावत करण्याच्या इंडिगोच्या नियमित प्रक्रियेचाच एक भाग आहे.नवीन दरवाढीचा लहान मुलांसह (दोन वर्षांखालील) प्रवास करणाऱ्या प्रवाशांवर याचा सर्वाधिक परिणाम होणार आहे. लहान मुलांच्या प्रवासाचे शुल्क २,००० रुपयांवरून ३,००० रुपये करण्यात आले आहे. यात १,००० रुपयांची वाढ झाली आहे. हे शुल्क दोन वर्षांखालील मुलांसाठी लागू आहे. या व्यवस्थेअंतर्गत, लहान मुलांना स्वतंत्र सीट मिळत नाही, तरीही त्यांच्यासाठी तिकीट बुक करणे अनिवार्य असते. या नवीन बदलामुळे एअरलाईनला सुमारे ९० कोटी रुपयांचे अतिरिक्त उत्पन्न मिळू शकेल, असा अंदाज आहे.
इंडिगोच्या विमानांमध्ये विहित मर्यादेपेक्षा जास्त सामान नेणाऱ्या प्रवाशांना आता अतिरिक्त सामानासाठी जास्त शुल्क द्यावे लागेल. अतिरिक्त सामानाचे शुल्क आता प्रति किलो ८०० रुपये झाले आहे. ते पूर्वी ७०० रुपये होते.
इंडिगोने प्राधान्य चेक-इन (priority check-in) आणि बोर्डिंगसाठीचे शुल्कही ४५० रुपयांवरून ६५० रुपये केले आहे; म्हणजेच प्रवाशांना या सेवेसाठी २०० रुपये अधिक द्यावे लागतील. याव्यतिरिक्त, प्रवास प्रमाणपत्राचे शुल्क २०० रुपयांवरून ३०० रुपये करण्यात आले आहे.
भारताच्या देशांतर्गत विमान वाहतूक क्षेत्रात इंडिगोचा बाजार हिस्सा ६६% पेक्षा अधिक आहे. आता कंपनी आंतरराष्ट्रीय स्तरावर आपला विस्तार वेगाने वाढवण्याचे धोरण राबवत आहे. २०२८ च्या सुरुवातीपासून एअरलाईनच्या ताफ्यात 'वाइड-बॉडी' A350-900 विमाने सामील होण्याची अपेक्षा आहे. इंडिगोने आधीच ९०० हून अधिक विमानांची ऑर्डर दिली आहे. या एअरलाईनकडे ४३० हून अधिक विमानांचा ताफा आहे आणि ती दररोज सुमारे २,२०० विमानांचे उड्डाण करते.
