India Africa Forum Summit postponed
नवी दिल्ली: आफ्रिकेतील इबोलाचा वाढता प्रादुर्भावाचा विचार करता भारत आणि आफ्रिकन युनियनने (AU) पुढील आठवड्यात नवी दिल्लीत होणारी 'भारत-आफ्रिका मंच शिखर परिषद' (India-Africa Forum Summit) पुढे ढकलण्याचा निर्णय घेतला आहे, अशी माहिती आज (दि. २१) परराष्ट्र मंत्रालयाने दिली. शिखर परिषदेच्या नवीन तारखा योग्य वेळी दोन्ही बाजूंच्या संमतीने निश्चित केल्या जातील, असेही परराष्ट्र मंत्रालयाने स्पष्ट केले आहे.
चौथी 'भारत-आफ्रिका मंच शिखर परिषद' २८ ते ३१ मे दरम्यान नवी दिल्लीत आयोजित करण्यात आली होती. या परिषदेत दोन्ही देशांचे मंत्री आणि नेते सहभागी होणार होते. व्यापार, गुंतवणूक, नाविन्यता (Innovation), विकास, डिजिटल तंत्रज्ञान, शाश्वतता (Sustainability) आणि जागतिक प्रशासन या क्षेत्रांतील सहकार्य अधिक दृढ करणे हा या शिखर परिषदेचा मुख्य उद्देश होता.
परराष्ट्र मंत्रालयाने जारी केलेल्या निवेदनात म्हटले आहे की, "आफ्रिकेच्या काही भागांमधील बदलत्या आरोग्य परिस्थितीवर" चर्चा केल्यानंतर, भारत आणि आफ्रिकन युनियनने ही शिखर परिषद पुढे ढकलणे "योग्य" राहील यावर सहमती दर्शवली आहे. मात्र, निवेदनात आरोग्यविषयक कारणांचा थेट विस्तृत उल्लेख करण्यात आलेला नाही.
आफ्रिकेच्या अनेक भागांत जीवघेण्या इबोला विषाणूच्या संसर्गाची प्रकरणे आढळून आली आहेत; यातील सर्वात अलीकडील प्रकरण 'डेमोक्रॅटिक रिपब्लिक ऑफ काँगो'च्या 'साउथ किवू' प्रांतात नोंदवले गेले आहे. येथे एका दुर्मिळ स्ट्रेनचा (strain) प्रादुर्भाव पसरत आहे, ज्यावर अद्याप कोणतीही लस उपलब्ध नाही. जागतिक आरोग्य संघटनेने (WHO) दिलेल्या माहितीनुसार, दोन महिन्यांपूर्वी सुरू झालेल्या या प्रादुर्भावामुळे आतापर्यंत ६०० संशयित रुग्ण आढळले असून १३९ संशयित मृत्यूची नोंद झाली आहे.
