Jobs Update
नवी दिल्ली : जॉब मार्केटमध्ये सध्या मोठे बदल होत असून आर्टिफिशियल इंटेलिजन्स (AI) मुळे अनेक नोकऱ्यांवर संकट येत आहे. AI मुळे काही नोकऱ्या धोक्यात आल्या आहेत, तर दुसरीकडे नवीन प्रकारच्या नोकऱ्या उपलब्ध होत असल्याचे अहवालात समोर येत आहे. मात्र, सध्याची वेळ एंट्री-लेव्हल नोकऱ्या करणाऱ्या किंवा शोधणाऱ्या लोकांसाठी अत्यंत कठीण आहे.
गेल्या काही काळापासून या वर्गावरच सर्वाधिक परिणाम झाला आहे. एंट्री-लेव्हल नोकऱ्यांमध्ये सुमारे २९ टक्क्यांपर्यंत घट झाली आहे. नोकरीचा हा बाजार कसा बदलत आहे आणि AI चा त्यावर किती परिणाम होत आहे, जाणून घ्या सविस्तर...
२०२५ या वर्षात लेबर मार्केटमध्ये एंट्री-लेव्हल नोकऱ्या शोधणाऱ्या उमेदवारांना खूप अडचणींचा सामना करावा लागला. या काळात मोठ्या संख्येने विद्यार्थ्यांनी आपले शिक्षण पूर्ण करून नोकरी शोधण्यास सुरुवात केली, मात्र त्यांना संधी खूपच कमी मिळाल्या. 'रँडस्टॅड' ने जगभरातील १२.६ कोटी नोकऱ्यांच्या केलेल्या विश्लेषणानुसार, जानेवारी २०२४ पासून सुरुवातीच्या स्तरावरील नोकऱ्यांमध्ये २९ टक्के घट झाली आहे. जी मंदी सुरुवातीला तात्पुरती वाटत होती, ती आता वेगाने संरचनात्मक होत चालली आहे.
अमेरिकेबद्दल बोलायचे झाले तर, जुलैमध्ये तरुणांमधील बेरोजगारीचा दर १०.८% पर्यंत पोहोचला, जो एकूण ४.३% दरापेक्षा दुप्पट आहे. आशिया आणि आफ्रिकेमध्ये ही आकडेवारी अधिक चिंताजनक आहे. भारतात १७%, चीनमध्ये १६.५% आणि मोरोक्कोमध्ये सुमारे ३६% बेरोजगारी आहे. ब्रिटनमध्ये २०२४ मध्ये सुमारे १७,००० सुरुवातीच्या पदांसाठी १.२ कोटी पदवीधरांनी अर्ज केले होते.
अनेक अहवालांनुसार AI मुळे नोकऱ्यांवर संकट येत असल्याचे समोर आले आहे. मात्र, 'वर्ल्ड इकॉनॉमिक फोरम'च्या अहवालानुसार, नोकऱ्यांची संख्या कमी होण्यामागे केवळ AI हे एकमेव कारण नाही. कॉर्पोरेट भरतीतील मंदी आणि आर्थिक अनिश्चितता यांसारखी कारणेही यासाठी जबाबदार आहेत. परिणामी, जेन-झेड अधिकाधिक अप्रेंटिसशिप आणि व्यावसायिक प्रशिक्षणाकडे वळत आहे.
जानेवारीमध्ये आलेल्या एका अहवालानुसार, २०३० पर्यंत ७८ दशलक्ष (७.८ कोटी) नवीन नोकऱ्या निर्माण होण्याची अपेक्षा आहे. सध्याच्या २२ टक्के नोकऱ्यांमध्ये संरचनात्मक बदल होतील. ८५ टक्के कंपन्या कर्मचाऱ्यांना नवीन कौशल्ये शिकवण्यावर भर देत आहेत, ज्यामध्ये प्रामुख्याने AI स्किल्स देण्यावर भर दिला जात आहे.
AI फर्म 'अँथ्रोपिक'च्या अहवालानुसार, ४९ टक्के नोकऱ्यांमधील किमान एक चतुर्थांश कामांमध्ये आता AI चा वापर केला जाऊ शकतो. २०२५ पासून यामध्ये १३ टक्क्यांनी वाढ झाली आहे. AI चा वापर अशा कामांमध्ये अधिक केला जातो ज्यासाठी सरासरीपेक्षा उच्च शिक्षणाची आवश्यकता असते, जसे की सॉफ्टवेअर डेव्हलपमेंट.
