Kolkata Earthquake: कोलकात्यात आज दुपारी भूकंपाचे तीव्र झटके बसले. रिश्टर स्केलवर याची तीव्रता ५.५ इतकी होती. या भूकंपामुळं लोकांमध्ये भीतीचं वातावरण होतं. लोकं सगळीकडे सैरभैर होऊन धावत होते. घरातून आणि ऑफिसमधून लोकांचे झुंड रस्त्यावर येत होते. सध्या तरी कोणत्याही जीवित किंवा वित्त हानीची बातमी मिळालेली नाही.
सुरूवातीच्या काही रिपोर्ट्सनुसार या भूकंपाचा केंद्रबिंदू हा शेजारी देश बांगलादेशमध्ये होता. या भूकंपाचे झटके काही सेंकदच जाणवले. मात्र उंच इमारतींमध्ये याची तीव्रता जास्त जाणवत होती.
मिळालेल्या माहितीनुसार भूकंपाचा केंद्रबिंदू हा जमिनीपासून १० किलोमीटर आत होता. कोलकात्यापासून १०० किलोमीटर दूर हा केंद्रबिंदू होता.
शहरातील अनेक भागातील लोकांनी घरातील ऑफिसमधील फर्निचर हलत असल्याचं आणि छतावरील पंखे देखील हलत असल्याची माहिती दिली. अनेक कार्यालयातील कर्मचाऱ्यांनी भूकंपाची जाणीव होताच मोकळ्या जागी जाणे पसंत केले. याचे अनेक व्हिडिओ सध्या सोशल मीडियावर शेअर केले जात आहेत.
टेक्टॉनिकल प्लेट्स जमिनीच्या आत असलेल्या लाव्हारसामुळं अत्यंत संथ गतीनं तरंगत किंवा सरकत असतात. ज्यावेळी या टेक्टॉनिकल प्लेट्स एकमेकांवर आदळतात त्यावेळी त्या एकमेकांपासून दूर जातात. तर काही वर खाली होत राहतात. त्यामुळं त्यांच्या कडांवर मोठा दबाव निर्माण होतो. या दबावामुळं डोंगर अचानक तुटू लागतात. ते वेगाने खचत असतात. यामुळं मोठी उर्जा निर्माण होते. ज्यावेळी ही लाट जमिनीवर पोहचते त्यावेळी जमीन हादरते आणि भूकंप जाणवतो.
