DRDO TARA kit:
ओडिशा: संरक्षण क्षेत्रातील 'आत्मनिर्भर भारत' मोहिमेला बळकटी देणारा एक मोठा टप्पा भारताने गाठला आहे. संरक्षण संशोधन आणि विकास संस्था आणि भारतीय हवाई दलाने ७ मे २०२६ रोजी ओडिशाच्या किनारपट्टीवर 'टॅक्टिकल ॲडव्हांस्ड रेंज ऑगमेंटेशन' या स्वदेशी शस्त्रास्त्राची पहिली यशस्वी चाचणी घेतली. ही भारताची पहिली स्वदेशी 'ग्लाइड' शस्त्रास्त्र प्रणाली असून, यामुळे भारतीय हवाई दलाची ताकद अनेक पटींनी वाढणार आहे.
'तारा' हे एक मॉड्यूलर रेंज एक्स्टेंशन किट आहे. सोप्या भाषेत सांगायचे तर, हे तंत्रज्ञान एखाद्या सामान्य आणि 'अनगाइडेड' (ज्याचा मार्ग नियंत्रित करता येत नाही अशा) बॉम्बला अत्याधुनिक 'प्रिसिजन गाइडेड' (अचूक लक्ष्य भेदणाऱ्या) शस्त्रात रूपांतरित करते. या किटच्या वापरामुळे जमिनीवरील शत्रूची ठिकाणे उद्ध्वस्त करण्याची क्षमता आणि अचूकता कमालीची वाढते. हे देशातील पहिले 'ग्लाइड' शस्त्र आहे जे अत्याधुनिक असूनही अत्यंत कमी खर्चात तयार करण्यात आले आहे. यामुळे महागड्या क्षेपणास्त्रांवरील अवलंबित्व कमी होईल.
या प्रगत प्रणालीची रचना हैदराबाद येथील 'रिसर्च सेंटर' आणि DRDO च्या इतर प्रयोगशाळांनी मिळून केली आहे. या प्रकल्पात 'डेव्हलपमेंट कम प्रॉडक्शन पार्टनर्स' आणि भारतातील अनेक संरक्षण उद्योगांनी मोलाचा वाटा उचलला आहे. विशेष म्हणजे, चाचणी यशस्वी होताच या उद्योगांनी आता त्याचे उत्पादनही सुरू केले आहे.
या ऐतिहासिक यशाबद्दल संरक्षण मंत्री राजनाथ सिंह यांनी DRDO, हवाई दल आणि संबंधित उद्योगांचे अभिनंदन केले. "भारताच्या स्वदेशी संरक्षण क्षमतेला एका नव्या उंचीवर नेणारे हे महत्त्वाचे पाऊल आहे," अशा शब्दांत त्यांनी या यशाचा गौरव केला. तसेच, DRDO चे अध्यक्ष डॉ. समीर व्ही. कामत यांनीही या प्रकल्पातील शास्त्रज्ञ आणि कर्मचाऱ्यांच्या परिश्रमांचे कौतुक करत ही भारतासाठी एक मोठे यश असल्याचे म्हटले आहे.
