PM Modi AI video
नवी दिल्ली : एका काँग्रेस नेत्याने पंतप्रधान नरेंद्र मोदी एका 'रेड-कार्पेट' कार्यक्रमात चहा विकत असल्याचे दर्शवणारा AI-जनरेटेड व्हिडिओ शेअर केल्यानंतर मोठा वाद निर्माण झाला आहे. भाजपने या व्हिडिओचा निषेध केला असून काँग्रेसने पंतप्रधानांचा अपमान केल्याचा आरोप केला आहे.
काँग्रेस नेत्या रागिणी नायक यांनी 'एक्स' वर हा व्हिडिओ "आता हे कोणी केले?" या कॅप्शनसह पोस्ट केला होता. या व्हिडिओमध्ये पंतप्रधान मोदी निळ्या रंगाचा कोट आणि काळ्या रंगाची पॅन्ट परिधान केलेले दिसत आहेत. ते एका रेड-कार्पेट कार्यक्रमात किटली आणि चहाचे ग्लास घेऊन फिरत आहेत. पार्श्वभूमीवर आंतरराष्ट्रीय ध्वज आणि भारताचा तिरंगाही दिसत आहे. या व्हिडिओमध्ये पंतप्रधान मोदींच्या आवाजाची नक्कल करणारा एक आवाज ऐकू येतो, जो म्हणतो, "चाय बोलो, चाये."
