cockroach janta party warning cjp protest government accused of reneging on promises
पुढारी ऑनलाईन : कॉकरोच जनता पार्टीने (CJP) इशारा दिला आहे की, सरकारने दिलेली आश्वासने पूर्ण केली नाहीत, तर देशात पुन्हा एकदा शांततापूर्ण आंदोलन सुरू केले जाईल.
कॉकरोच जनता पार्टीने (CJP) केंद्र सरकारवर तरुणांना दिलेल्या आश्वासनांपासून माघार घेतल्याचा आणि त्यांचा विश्वासघात केल्याचा गंभीर आरोप केला आहे. पक्षाच्या म्हणण्यानुसार, २५ जुलै रोजी झालेल्या कराराच्या आधारावर देशव्यापी आंदोलन मागे घेण्यात आले होते. मात्र, आता सरकार त्या कराराची अंमलबजावणी करण्यापासून मागे हटत आहे. सरकारने आपली आश्वासने पूर्ण केली नाहीत, तर पुन्हा देशव्यापी शांततापूर्ण आंदोलन छेडले जाईल, असा इशारा CJPने दिला आहे.
सर्वोच्च न्यायालयाची टिप्पणी आणि सरकारची भूमिका
CJPच्या कायदेशीर पथकातील सदस्य आणि नेत्यांच्या म्हणण्यानुसार, १८ ऑगस्ट रोजी सर्वोच्च न्यायालयात झालेल्या सुनावणीदरम्यान न्यायालयाने केंद्र सरकारकडे विद्यार्थ्यां आणि आंदोलकांविरोधात दाखल करण्यात आलेल्या FIRची संपूर्ण यादी तीन वेळा मागितली होती.
सर्वोच्च न्यायालयाला भारतीय संविधानाच्या अनुच्छेद १४२ अंतर्गत मिळालेल्या विशेष अधिकारांचा वापर करून सर्व प्रकरणे एकाच वेळी रद्द करण्याची इच्छा होती, ज्यामुळे ही प्रक्रिया सुलभ झाली असती. मात्र, न्यायालयाने वारंवार विचारणा करूनही केंद्र सरकारने ही यादी सादर करण्याबाबत कोणतीही स्पष्ट बांधिलकी व्यक्त केली नसल्याचा आरोप CJPने केला आहे.
प्रेस कॉन्फरन्समध्ये CJPचे सहसंयोजक सौरव दास आणि कायदेविषयक प्रकरणांचे प्रमुख रत्ना सिंह यांनी आरोप केला की, आंदोलन संपवून घेतल्यानंतर सरकार देशातील तरुणांची फसवणूक करण्याचा प्रयत्न करत आहे.
काय होती सरकारची प्रमुख आश्वासने?
CJPच्या नेत्यांनी सांगितले की, संयुक्त पत्रकार परिषदेत सरकारने त्यांना दोन प्रमुख आश्वासने दिली होती.
खटले मागे घेणे :
आंदोलनादरम्यान विद्यार्थी आणि आंदोलकांविरोधात दाखल करण्यात आलेले सर्व FIR तातडीने मागे घेतले किंवा रद्द केले जातील. तसेच भविष्यात कोणावरही दंडात्मक कारवाई केली जाणार नाही.
पीडितांच्या कुटुंबीयांना भरपाई :
NEET परीक्षेशी संबंधित वादात जीव गमावलेल्या विद्यार्थ्यांच्या कुटुंबीयांना सन्मानजनक भरपाई दिली जाईल.
पक्षाच्या म्हणण्यानुसार, सरकारच्या वाटाघाटी पथकाने या आश्वासनांवर आतापर्यंत झालेल्या प्रगतीबाबत कोणतेही औपचारिक लेखी आश्वासन दिलेले नाही.
२४ ऑगस्टला राष्ट्रीय कार्यकारिणीची बैठक
या पार्श्वभूमीवर कॉकरोच जनता पार्टीची राष्ट्रीय कार्यकारिणीची बैठक २४ ऑगस्ट रोजी बोलावण्यात आली आहे. या बैठकीत सध्याच्या परिस्थितीचा आढावा घेऊन पुढील रणनीती निश्चित केली जाणार आहे.
पक्षाने म्हटले आहे की, सरकारने आपली आश्वासने पूर्ण करावीत यासाठी सर्व आवश्यक पावले उचलली जातील. यामध्ये पुन्हा देशव्यापी आंदोलन सुरू करण्याचाही पर्याय आहे.
CJPने म्हटले की, धर्मेंद्र प्रधान यांचा राजीनामा ही पक्षाची पहिली मोठी कामगिरी होती. मात्र, तरुणांना दिलेले प्रत्येक आश्वासन पूर्ण होईपर्यंत लढा सुरूच राहणार आहे.
CJPने देशभरातील विद्यार्थी, तरुण आणि आपल्या कार्यकर्त्यांना २४ ऑगस्टच्या बैठकीत होणाऱ्या निर्णयांसाठी तयार राहण्याचे आवाहन केले आहे.
