CJP Future Strategy: जंतर-मंतरवरील विद्यार्थ्यांच्या आंदोलनानंतर देशभर चर्चेत आलेल्या कॉकरोच जनता पार्टीच्या (CJP) पुढील वाटचालीबाबत आता पक्षाचे प्रवक्ते सौरव दास यांनी महत्त्वाचे वक्तव्य केले आहे. CJP राजकीय पक्ष म्हणून निवडणूक लढवणार का, या चर्चांना पूर्णविराम देत त्यांनी "CJP हा राजकीय पक्ष नसून जनआंदोलन आहे आणि पुढेही त्याच स्वरूपात काम करणार आहे," असे स्पष्ट केले.
सौरव दास यांनी सांगितले की, विद्यार्थ्यांच्या आंदोलनाला मिळालेल्या यशानंतर CJP ची पुढील दिशा काय असणार, याबाबत अनेकांकडून प्रश्न विचारले जात आहेत. याच पार्श्वभूमीवर संघटनेची दोन दिवसांची बैठक औरंगाबाद येथे आयोजित करण्यात आली आहे.
या बैठकीत देशभरातील युवकांपर्यंत आंदोलन कसे पोहोचवायचे, तळागाळातील लोकांशी कसा संवाद साधायचा आणि पुढील रणनीती काय असावी, यावर चर्चा होणार असल्याचे त्यांनी सांगितले.
सौरव दास यांच्या मते, CJP ला देशभरातून मोठा पाठिंबा मिळत आहे. त्यामुळे केवळ सोशल मीडियापुरते मर्यादित न राहता, थेट लोकांमध्ये जाऊन त्यांच्या अडचणी, समस्या आणि अपेक्षा समजून घेण्याचा संघटनेचा प्रयत्न असेल.
युवकांसाठी ठोस अजेंडा तयार करण्यासाठी या बैठकीत चर्चा होणार असून, त्यानंतर अंतिम निर्णय जाहीर केला जाईल, असे त्यांनी सांगितले.
या प्रश्नावर सौरव दास यांनी स्पष्ट शब्दांत उत्तर दिले. ते म्हणाले, "CJP हा राजकीय पक्ष नाही आणि सध्या तरी राजकीय पक्ष बनण्याचा कोणताही विचार नाही."
त्यांच्या मते, देशात आधीच शेकडो राजकीय पक्ष कार्यरत आहेत. तरीही अनेक नागरिक आणि युवक विविध समस्यांना सामोरे जात आहेत. त्यामुळे आणखी एक राजकीय पक्ष निर्माण करण्यापेक्षा समाजात जनजागृती करणारे आणि सरकारवर लोकहितासाठी दबाव निर्माण करणारे 'प्रेशर ग्रुप' अधिक गरजेचे आहेत.
सौरव दास यांनी सांगितले की, CJP पुढेही युवकांचे प्रश्न, शिक्षण, रोजगार आणि लोकहिताच्या मुद्द्यांवर जनआंदोलनाच्या माध्यमातून काम करत राहील. संघटनेचा उद्देश निवडणुकीच्या राजकारणात उतरण्यापेक्षा लोकांमध्ये जागरूकता निर्माण करणे आणि त्यांच्या प्रश्नांना आवाज देणे हा आहे.
दरम्यान, सोशल मीडियावर CJP शी जोडलेल्या अनेक युवकांनी या संघटनेने भविष्यात राजकीय पक्ष म्हणून निवडणुका लढवावी, अशी मागणी केली आहे. यावर प्रतिक्रिया देताना सौरव दास म्हणाले की, लोकांच्या सर्व सूचनांचा आम्ही आदर करतो. मात्र, सध्याच्या घडीला देशाला नव्या राजकीय पक्षापेक्षा प्रभावी जनआंदोलनाची अधिक गरज आहे. बैठकीनंतर संघटनेची पुढील भूमिका आणि भविष्यातील कार्यक्रम अधिकृतपणे जाहीर करण्यात येणार असल्याचेही त्यांनी स्पष्ट केले.
