नवी दिल्ली : बिहारमधील पूरग्रस्तांच्या मदतीसाठी भारतीय जनता पक्षाचे राष्ट्रीय अध्यक्ष नितीन नवीन यांनी आपल्या तीन महिन्यांच्या वेतनाची रक्कम मुख्यमंत्री मदत निधीत जमा केली आहे. राज्यसभा सदस्य म्हणून मिळालेल्या वेतनातून त्यांनी ६ लाख ३५ हजार रुपये पूरग्रस्तांच्या मदतीसाठी दान केले.
बिहारमधील पूरस्थितीबाबत नितीन नवीन यांनी चिंता व्यक्त केली. पूरग्रस्तांना तातडीने मदत मिळावी, यासाठी राज्य सरकारकडून सुरू असलेल्या उपाययोजना आणि केंद्र सरकारकडून दिल्या जाणाऱ्या मदतीचा नितीन नवीन यांनी उल्लेख केला. पूरामुळे पिकांचे मोठे नुकसान झाले असून, नुकसानीचे मूल्यांकन करण्याची प्रक्रिया सुरू आहे. संकटाच्या काळात सरकार नागरिकांच्या पाठीशी ठामपणे उभे असल्याचे भाजपकडून सांगण्यात आले. शेतकऱ्यांपर्यंत मदत पोहोचविण्याचे काम सुरू असून, मदत आणि बचावकार्याचा केंद्रीय गृहमंत्री शिवराजसिंह चौहान यांनीही आढावा घेतल्याचे भाजपने सांगितले.
पूरग्रस्त कुटुंबांना ५५० कोटींची मदत
बिहारमधील एनडीए सरकार पूरग्रस्त कुटुंबांना तातडीने मदत पोहोचविण्यासाठी कार्यरत असल्याचे भाजपने म्हटले आहे. पक्षाच्या माहितीनुसार, आतापर्यंत पूरग्रस्त कुटुंबांपर्यंत ५५० कोटी रुपयांची मदत पोहोचविण्यात आली आहे. प्रत्येक पूरग्रस्त कुटुंबाला ७ हजार रुपयांची आर्थिक मदत देण्यात येत आहे. याशिवाय मदत छावण्या, सामुदायिक स्वयंपाकगृहे आणि वैद्यकीय सुविधा उपलब्ध करून देण्यात आल्या आहेत. राष्ट्रीय आपत्ती प्रतिसाद दल (एनडीआरएफ) आणि राज्य आपत्ती प्रतिसाद दलाच्या (एसडीआरएफ) पथकांकडून मदत व बचावकार्य सातत्याने सुरू असल्याचे भाजपकडून सांगण्यात आले.
