बंगळूरु: बंगळूरु येथील एका नामांकित खासगी अभियांत्रिकी महाविद्यालयाच्या कॅम्पसमध्ये एका ज्युनिअर विद्यार्थ्याने सिनिअर विद्यार्थिनीवर बलात्कार केल्याची धक्कादायक घटना उघडकीस आली आहे. या प्रकरणी पोलिसांनी २२ वर्षीय विद्यार्थ्याला अटक केली आहे. त्याला न्यायालयात हजर करून त्याची न्यायालयीन कोठडीत रवानगी करण्यात आली आहे. ही घटना १० ऑक्टोबर रोजी घडली.
पोलिसांनी दिलेल्या माहितीनुसार, पीडिता आणि संशयित आरोपी दोघेही एकाच अभियांत्रिकी महाविद्यालयात शिकतात. जीवन गौडा असे संशयित आरोपीचे नाव आहे. तो शैक्षणिक थकबाकीमुळे एक वर्ष मागे राहिला. पीडित विद्यार्थिनी बी.टेकच्या सातव्या सत्रात शिकत असून ती आरोपीला तीन महिन्यांपासून ओळखत होती.
तक्रारीत पीडितेने म्हटले आहे की, जेवणाच्या सुट्टीत, जीवनने तिला अनेक वेळा फोन केला आणि आर्किटेक्चर ब्लॉकच्या सातव्या मजल्यावर भेटण्यास सांगितले. ती आल्यावर त्याने तिचा विनयभंग केला. ती लिफ्टने जात असताना, तो तिच्या मागे सहाव्या मजल्यावर गेला. तिथे त्याने तिला पुरुषांच्या शौचालयात ओढत नेले, दरवाजा बंद केला आणि तिच्यावर बलात्कार केला.
पीडितेने सांगितले की, एका मैत्रिणीने तिला फोन करण्याचा प्रयत्न केला तेव्हा आरोपीने तिचा मोबाईल फोनही हिसकावून घेतला. घटनेनंतर, विद्यार्थिनीने तिच्या मैत्रिणींना सांगितले, त्यांनी तिला तिच्या पालकांना कळवण्यास सांगितले. नंतर, आरोपीने तिला फोन केला आणि तिला गर्भनिरोधक गोळी हवी आहे का, असे विचारले, परंतु विद्यार्थिनीने कॉल डिस्कनेक्ट केला. सुरुवातीला भीतीमुळे विद्यार्थिनी गप्प राहिली, परंतु नंतर तिने तिच्या पालकांना सांगितले. या प्रकरणी १५ ऑक्टोबर रोजी हनुमंतनगर पोलिस ठाण्यात तक्रार दाखल करण्यात आली आहे.
