भाजपशासित राज्यांच्या मुख्यमंत्र्यांची रविवारी बैठक, आगामी निवडणुकांवर खलबते

पुढारी वृत्तसेवा, नवी दिल्ली :  भारतीय जनता पक्षाने येत्या रविवारी (दि.८) देशभरातील भाजपशासित राज्यांचे मुख्यमंत्री व उपमुख्यमंत्र्यांची बैठक बोलवली असल्याची माहिती सूत्रांनी दिली आहे. पुढील वर्षाच्या मध्यात होणाऱ्या लोकसभा निवडणुकीच्या तयारीवर या बैठकीत चर्चा होण्याची शक्यता आहे. पंतप्रधान नरेंद्र मोदी हे या बैठकीला उपस्थित राहणार काय? याकडे सर्वांचे लक्ष लागले आहे.

भाजपाध्यक्ष जे. पी. नड्डा यांनी बोलाविलेल्या या बैठकीला जे प्रमुख नेते हजर राहणार आहेत, त्यात केंद्रीय गृहमंत्री अमित शहा, संघटन सचिव बी. एल. संतोष यांचा समावेश आहे. याशिवाय पक्षाचे राष्ट्रीय सरचिटणीस तसेच राज्यांच्या संघटनात्मक सचिवांना बैठकीसाठी पाचारण करण्यात आले आहे.