SensexNiftyFall : बाजार गडगडला! गुंतवणूकदारांचे 5 लाख कोटी बुडाले!
पुढारी ऑनलाईन डेस्क : देशांतर्गत शेअर बाजारात जोरदार विक्री होत आहे. आजच्या व्यवहारात सेन्सेक्स आणि निफ्टी या दोन्ही निर्देशांकांमध्ये मोठी घसरण झाली आहे. सेन्सेक्समध्ये सुमारे 1000 अंकांची घसरण नोंदवली गेली. त्यानंतर निफ्टी 17650 पर्यंत खाली आला. बाजारात जवळपास सर्वच क्षेत्रातील समभागांची विक्री होत असल्याचे चित्र आहे. सलग तिसऱ्या दिवशी शेअर बाजारात घसरण पाहायला मिळत आहे. अमेरिकन बाजाराच्या कमजोर कल आणि विक्रीच्या दबावाचा थेट परिणाम भारतीय शेअर बाजारावर झाला असल्याचे तक्ज्ञांचे मत आहे.
आयटी आणि ऑटो निर्देशांक निफ्टी 2 टक्क्यांहून अधिक कमकुवत झाले आहेत. बँक आणि आर्थिक क्षेत्रातही कमजोरी आहे. परिणामी बाजारातील या घसरणीत गुंतवणूकदारांचे सुमारे 5 लाख कोटी रुपये बुडाले आहेत. अलीकडच्या आकडेवारीवरून अमेरिकेतील इकॉनॉमिक ग्रोथचे चित्र धूसर असल्याचे तज्ज्ञांचे म्हणणे आहे. महागाईच्या आकडेवारीनेही निराशा केली, ज्यामुळे व्याजदर अपेक्षेपेक्षा जास्त वाढू शकतात, असा अंदाज वर्तवण्यात आला आहे.
गुंतवणूकदारांचे 5 लाख कोटी बुडाले
आज (दि. 16) बाजार कोसळल्याने गुंतवणूकदारांचे मोठे नुकसान झाले. काल (गुरुवार) बीएसई (BSE) सूचीबद्ध कंपन्यांचे मार्केट कॅप 2,80,53,081.37 कोटी होते. आज दुपारी दीड वाजेपर्यंत ते 2,85,87,358.36 कोटींवर आले आहे. म्हणजेच काही तासांतच गुंतवणूकदारांचे सुमारे 5 लाख कोटी रुपयांचे नुकसान झाले.
बाजार का पडला, निफ्टी किती कमजोर होईल?
अर्थ तज्ज्ञांच्या माहितीनुसार, दीर्घकाळ टिकून राहिल्यानंतर बाजारात आता विक्रीचा दबाव दिसत आहे. जागतिक बाजार अस्थिर राहिला आहे. डॉलर निर्देशांक आणि रोखे उत्पन्न वाढले आहे. अमेरिकेतील चलनवाढीच्या आकड्यानेही परिणाम झाला आहे. एफओएमसीच्या बैठकीनंतर जागतिक बाजारात मंदीचे वातावरण आहे. यूएस फेड 100 बेसिस पॉइंटने दर वाढवू शकते. 17470-17400 च्या पातळीवर निफ्टीसाठी आता डिमांड झोन आहे, असे त्यांनी सांगितले आहे.
जागतिक बँक आणि आंतरराष्ट्रीय नाणेनिधी (IMF)ने जागतिक मंदीची भीती व्यक्त केली आहे. मंदीच्या भीतीने गुंतवणूकदार सावध झाले आहेत. त्याच वेळी, अमेरिकेत महागाई उच्च पातळीवर आहे, ज्यामुळे दर वाढवले जाऊ शकतात. या सर्व प्रकारामुळे विक्री होताना दिसत आहे. निफ्टी सध्या 17300 च्या पातळीवर आहे. पण अजून निफ्टीत मोठी घसरण होऊ शकते, असाही अंदाज अर्थ तज्ज्ञांनी वर्तवला आहे.
अमेरिकन बाजारात घसरण…
गुरुवारी अमेरिकन बाजार घसरणीने बंद झाला. अमेरिकन अर्थव्यवस्थेच्या धुसरतेमुळे गुंतवणूकदार सावध आहेत. गुरुवारी नॅस्डॅक 1.43 टक्क्यांनी घसरून 11,552.36 च्या पातळीवर बंद झाला. S&P 500 निर्देशांक 1.13 टक्क्यांनी घसरला आणि 3,901.35 वर बंद झाला. तर डाऊ जोन्स 173 अंकांनी कमजोर होऊन 30,961.82 च्या पातळीवर बंद झाला.
आशियाई बाजारात विक्री
आजच्या व्यवहारात प्रमुख आशियाई बाजारांमध्ये विक्री दिसून आली. SGX निफ्टी 0.58 टक्क्यांनी, तर Nikkei 225 देखील 1.08 टक्क्यांनी घसरला आहे. जर स्ट्रेट टाइम्स फ्लॅट आहे, तर हँग सेंगमध्ये 0.81 टक्के घसरण नोंदवण्यात आली. तैवान वेटेड 0.94 टक्के आणि कोस्पी 0.62 टक्क्यांनी खाली आहे. शांघाय कंपोझिट 0.61 टक्क्यांनी घसरला आहे.