Lashkar Commander’s ‘Water Force’ Claim: भारताविरोधात पुन्हा एक मोठा दहशतवादी कट रचला जात असल्याचा दावा केला जात आहे. पाकिस्तानमध्ये सक्रिय असलेली दहशतवादी संघटना लष्कर-ए-तैयबा (LeT) कडून 26/11सारखा हल्ला करण्याची तयारी सुरू असल्याचे संकेत काही व्हिडीओ आणि पुराव्यांमधून मिळत आहेत.
सोशल मीडियावर व्हायरल होत असलेल्या एका व्हिडीओमध्ये लष्कर-ए-तैयबाची सहयोगी संघटना म्हणून ओळखल्या जाणाऱ्या PMMLचा नेता हारिस डार प्रशिक्षणाचा आढावा घेताना दिसत असल्याचा दावा केला जात आहे.
या प्रशिक्षणामध्ये दहशतवाद्यांना—
स्कुबा डायव्हिंग
हाय-स्पीड बोट हाताळणे
अंडरवॉटर ऑपरेशन्स
यासारख्या गोष्टी शिकवल्या जात असल्याचे सांगितले जात आहे.
इतकंच नाही, तर सोशल मीडिया ऑपरेशन्सचेही प्रशिक्षण दिले जात असल्याचा दावा करण्यात आला आहे. सुरक्षा तज्ज्ञांच्या मते, अशा प्रकारचे प्रशिक्षण म्हणजे समुद्री मार्गाने भारतावर हल्ला करण्याचा कट आहे.
व्हिडीओमध्ये लष्करचा एक कमांडर उघडपणे कबूल करत आहे की “लष्करची ‘वॉटर फोर्स’ तयार केली जात आहे.” कमांडरच्या म्हणण्यानुसार, PMML आणि लष्करमध्ये तीन भागांत कार्यक्रम घेण्यात आले आणि 135 तरुणांना बोट चालवणे व समुद्री ऑपरेशन्सचे प्रशिक्षण देण्यात आले.
याआधी लष्करचा डेप्युटी चीफ मानला जाणारा सैफुल्लाह खालिद कसूरी यानेही समुद्रातून भारतावर हल्ला करण्याची धमकी दिल्याची माहिती आहे. हे व्हिडीओ समोर आल्यानंतर भारतीय सुरक्षा यंत्रणा अलर्ट मोडवर असल्याचे सांगितले जात आहे. याला ‘समुद्री दहशतवादी धोका’ (Maritime Terror Threat) म्हणून गंभीरपणे पाहिले जात आहे.
अहवालांनुसार, लष्कर या प्रशिक्षित दहशतवाद्यांचा वापर जम्मू-काश्मीर आणि भारतातील किनारपट्टीवरील शहरांमध्ये अशांतता पसरवण्यासाठी करू शकते, अशी शक्यता वर्तवली जात आहे. या प्रकरणामुळे पाकिस्तानकडून दहशतवादी संघटनांना मिळणारा छुपा पाठिंबा पुन्हा एकदा समोर येत असल्याचे विश्लेषकांचे मत आहे. त्यामुळे देशाच्या किनारपट्टीवरील सुरक्षा व्यवस्था आणखी कडक करण्यावर भर दिला जात असल्याची शक्यता आहे.
